Birinshi synypqa baratyndar úshin qujattardy qabyldaý 1 sáýirden bastalady. Bul týraly QR Bilim jáne ǵylym ministrligi Mektepke deiingi jáne orta bilim komitetiniń tóraǵasy Gúlmira Kárimova aitty, dep habarlaidy QazAqparat.
Balalardy mektepke qabyldaý tártibi QR BǴM 2018 jylǵy 12 qazandaǵy 564 buiryǵymen bekitilgen oqýǵa qabyldaýdyń úlgilik qaǵidalarynda aiqyndalǵan. 1-synypqa 6 jastan bastap balalar ata-anasynyń nemese bilim alýshylardyń zańdy ókiliniń jeke ótinishi negizinde qabyldanady.
Osy oraida mynadai qujattar qajet: balanyń týý týraly kýáliginiń kóshirmesi; 026/ý-3 nysany boiynsha densaýlyq pasporty; 063/ý nysany boiynsha densaýlyq jaǵdaiy týraly qujat (ekpe kartasy) jáne 3h4 kólemindegi fotosýrettiń eki danasy.
«Qujattardy qabyldaý biylǵy kúntizbelik jyldyń 1 sáýirinen 1 tamyzyna deiin júrgiziledi», - dedi G. Kárimova Ortalyq kommýnikatsiialar qyzmetinde.
Birneshe jyl boiy qujattardy jáne balalardy mektepke qabyldaý boiynsha memlekettik qyzmet avtomattandyryldy. 1-synypqa qabyldaý elektrondyq úkimettiń Egov.kz veb-portaly arqyly júzege asyrylady. Óńirlerdegi bilim basqarmalary áleýmettik jeliler men BAQ arqyly ata-analar arasynda balalardy mektepke qabyldaý erejeleri týraly aqparattyq-túsindirý jumystaryn qosymsha júrgizetin bolady.
Onyń aitýynsha, biyl birinshi synypqa 420 myń búldirshin barady dep eskerilgen. Bul kórsetkish byltyrǵa qaraǵanda joǵary.
