QR bilim jáne ǵylym ministri Ashat Aimaǵambetov vedomstvodaǵy birinshi basshynyń qyzmetin qamtamasyz etetin shtattardy qysqartatynyn aitty, dep habarlaidy QazAqparat tilshisi.
Ministr Ashat Aimaǵambetov JOO rektorlary men bilim basqarmalarynyń basshylaryna jańa oqý jylynda qandai negizgi jumystar jasalý kerektigin aitty.
«Ministrliktiń birinshi basshysynyń qyzmetin qamtamasyz etetin shtattar sanyn qysqartý kerek. Qysqartý zań aiasynda júretin bolsyn. Olarǵa basqa jumys usynamyz nemese eńbek zańnamasy boiynsha aldyn ala eskertip, tiisti sharalar qabyldaimyz», - dedi ol.
Ol sondai-aq, Qazaq gýmanitarlyq zań ýniversitetiniń janynan qurylǵan Jobalar ofisiniń jumysyna úkimettik emes uiym ókilderin belsendi qatystyrý kerektigin aitty.
«Biz bul ofiske úkimettik emes uiym ókilderin shaqyryp otyrmyz. Bilim salasy boiynsha kórsetiletin memlekettik qyzmetterdi qaita qurmaqpyz. Sol boiynsha usynystar qabyldaýǵa daiynbyz. Ministrliktiń barlyq biznes-protsesteri boiynsha jemqorlyq kórsetkishine aýdit júrgizemiz. Bir protsestiń nege sonsha uzaqqa sozylatynyn, oǵan syrttan aralasý derekteri bar-joǵyn anyqtaimyz», - degen Ashat Aimaǵambetov jemqorlyqpen kúres boiynsha jańa strategiia qabyldanatynyn eskertti.
«Jemqorlyqqa qarsy jańa strategiia jasaimyz. Ai saiyn osy másele boiynsha esep tyńdalatyn bolady. Joǵary oqý oryndarynyń, ǵylymi-zertteý institýttarynyń, bilim basqarmalarynyń basshylary bul máselege basymen jaýap beredi. Qajet bolsa, qyzmetinen bosatamyz. Bilim basqarmalarynyń basshylaryn oblystyq ákimdik taǵaiyndaǵanymen, ministrlik olardy qyzmetinen bosatýǵa quzyretti ekenin esterińizge salamyn», - dedi vedomstvo basshysy.
