Aqmola oblysynyń qylmystyq atqarý júiesi departamenti ETs-166/11 túzetý mekemesiniń qyzmetkerleri «Biz birgemiz» aktsiiasy sheńberinde Jeńistiń 75 jyldyǵyna orai tyl ardageri Liýdmila Miroshnichenkoǵa azyq-túlik jetizip, úi sharýasyna kómektesti, dep habarlaidy "Ult aqparat" vedomstvonyń baspasóz qyzmetine silteme jasap.
Liýdmila Trofimovna Chernigov oblysynda týǵan. Soǵys bastalǵan kezde jasy 9-da bolǵan, 11 jasynda anasymen birge Stepanakert qalasyndaǵy maidanger ákesine baryp, sonda parashiýt tigetin fabrikada eńbek etken. Soǵys aiaqtalǵan soń 1952 jyly Qazaqstanǵa qonys aýdarǵan. Keiin 1963 jyly Aqmola oblysynyń Zavodskoi kentine kóship keledi.
«Sodan beri tapjylmastan osy aýylda turyp kelemin», – deidi qariia.
Ol quqyq qorǵaý organdarynyń qyzmetkerlerin óziniń áriptesi sanaidy. Liýdmila Trofimovna joldasy Iakov Moiseimen birge 1963-1982 jyldar aralyǵynda órt sóndirý bóliminde qyzmet etken.
«Men kishi serjant dárejesinde, dispetcher laýazymynda qyzmet istedim, – dep eske alady qariia. – Qansha jyl ótse de, barlyǵy keshe ǵana bolǵan siiaqty. Umytpai kelip, kómektesip jatqandaryńyzǵa alǵysym sheksiz. Sizderdi kórip qýanyp qaldym».
Jeńis kúni qarsańynda tyl ardageriniń úiine barǵan ETs-166/11 túzetý mekemesiniń qyzmetkerleri qariiany azyq-túlikpen qamtamasyz etip qana qoiǵan joq, úiiniń ishi men aýlasyn jinastyryp kómektesti. Sonymen birge, qariiaǵa koronavirýs infektsiiasynyń taralýyna bailanysty qaýipsizdik sharalary týraly aityp túsindirdi.
«Soǵystyń aiaqtalǵanyna biyl 75 jyl tolsa da, sol surapyl soǵysta jaýdy jeńýge úles qosqan maidangerlerimiz ben tyl ardagerleriniń erligi óskeleń urpaqtyń máńgi jadynda saqtalǵan. Olarǵa qamqorlyq kórsetý – óskeleń urpaqtyń paryzy» deidi vedomstvonyń baspasóz qyzmetindegiler.
