«Nur Otan» partiiasy Tóraǵasynyń birinshi orynbasary Baýyrjan Baibek tasqynnan zardap shekken maqtaaraldyqtarǵa Elbasynyń sálemin jetkizdi. Aimaq basshysy Ómirzaq Shókeevpen birge Myrzakent aýylynda boi kótergen jańa yqshamaýdannyń bolashaq qonys ielerimen kezdesip, turǵyndardyń jaǵdaiymen tanysty, dep habarlaidy "Ult aqparat".
Partiia Tóraǵasynyń birinshi orynbasary Myrzakent kentinde tótenshe jaǵdaiǵa bailanysty qurylǵan shtab otyrysyn ótkizip, tabiǵi apat saldaryn joiý barysyna qanyqty. Otyrys barysynda sóz alǵan Baýyrjan Baibek topan sýdan zardap shekken aýyldardaǵy infraqurylymdyq jelilerdi iaǵni jol, aýyz sý, gaz qubyrlaryn qaita qalpyna keltirý, aýyl sharýashylyǵy taýar óndirýshilerine erekshe qoldaý kórsetý syndy máselelerge airyqsha mán berýge shaqyrdy. Munan soń Myrzakent kentiniń shyǵys jaq betindegi salynyp jatqan jańa shaǵynaýdanǵa atbasyn burdy. Ondaǵy qurylys jumystarynyń barysymen tanysyp, jańa shaǵynaýdanda partiia atynan 20 úi soǵylatynyn jetkizdi. Alǵashqy úidiń irgetasyn qalaý rásimine qatysty. Iaǵni, Elbasynyń bastamasy boiynsha Tuńǵysh Prezident Qory men «Nur Otan» partiiasy qurǵan «Birgemiz» qory Myrzakent eldi mekenine 20 úi turǵyzý úshin 340 mln teńge bólý týraly sheshim qabyldap otyr. Osylaisha topan sý astynda qalǵan Dostyq aýyly turǵyndarynyń baspana máselesi tolyqtai sheshilmek. Mundaǵy jumys sapasy avtorlyq jáne tehnikalyq baqylaý salasyndaǵy mamandardyń qatysýymen, erekshe partiialyq baqylaýda bolatynyn atap ótti.
«Elbasynyń tapsyrmasymen osynda kelip otyrmyn. Erteń ony baiandaityn bolamyn. Qai kúide ekenderińizdi jaqsy túsinemin. Aiaq astynan bolǵan jaǵdai, az ýaqyttyń ishinde. Ómirzaq Estaiuly ózi Arysta boldy, basqa da qiyn jaǵdailarda. Elbasy tapsyrmasy boiynsha Túrkistan qalasy salynyp jatyr. Eń tájiribeli ákimderdiń biri. Sizder jalǵyz qalmaisyzdar. «Nur Otan» halyqtyń partiiasy bolǵandyqtan, biz sizdermen birgemiz», – dedi Baýyrjan Baibek.
Elbasynyń sálemin estigen maqtaaraldyqtar bir marqaiyp qaldy. Alǵystaryn aityp, aq batalaryn berdi.
Aita keteiik, jańa shaǵynaýdanda aldaǵy eki aida jańa 505 úi boi kóteretin bolady. Sondai-aq, munda 1500 oryndyq bilim uiasy men 280 oryndyq balabaqshanyń qurylysy júrgizilmek. Budan bólek, infraqurylymdyq qajettilikter: iaǵni, jol, sý, gaz qubyrlary tartylyp, sáýleti kelisken shaǵynaýdanǵa ainalmaq.
Baýyrjan Qydyrǵaliuly nazarynan aýyldaryn sý basyp, búginde Atakent kentindegi evakýatsiialyq ortalyqtarǵa jaiǵastyrylǵan Dostyq, Jeńis, Firdoýsi, Jańaturmys jáne Órgebas aýyldarynyń turǵyndary da tys qalǵan joq. Ondaǵy kezdesý barysynda turǵyndar ózderin tolǵandyrǵan suraqtarǵa jan-jaqty jaýap alyp, «Nur Otan» partiiasynyń atqaryp jatqan jumystaryna alǵystyryn bildirdi. Munan soń «Nur Otan» partiiasy Tóraǵasynyń birinshi orynbasary Atakent kentinde ornalasqan oblystyq shtabtyń ortalyqtandyrylǵan qoimasyna bardy. Ondaǵy zardap shekken turǵyndarǵa kómek qolyn sozyp júrgen bir top eriktilermen kezdesip, pikir almasty. Olardyń Maqtaaraldaǵy apattyń saldaryn joiý baǵytyndaǵy bastamalaryna rizashylyǵyn bildirdi.
