«Birgemiz» qoǵamdyq qoryna koronavirýspen kúreske arnalǵan qaiyrymdylyq qarajaty erikti túrde jinalýy tiis. Bul jaiynda QR Tuńǵysh Prezidentiniń baspasóz hatshysy Aidos Úkibai jazdy, dep habarlaidy "Ult aqparat".
«Búginde «Birgemiz» qoǵamdyq qory qaiyrymdylyq qarajatyn biznes-qoǵamdastyqtar men kásipkerlerden ǵana jinap jatyr. Iaǵni, eń birinshi kezekte Elbasy úndeýi joldanǵandardan ǵana«, - dep atap ótti ol Twitter-degi jazbasynda.
Osy oraida Aidos Úkibai elimizdiń birqatar óńirinde biýdjettik sala qyzmetkerlerinen «Birgemiz» qoǵamdyq qoryna májbúrli túrde qaiyrymdylyq qarajaty jinalyp jatyr delingen aqparattyń taralǵandyǵyn atap ótedi.
«Mundai «bastamalarǵa« jol berýge bolmaidy. Barlyq qaiyrymdylyq tek qana erikti túrde júzege asyrylýy tiis», - dedi Elbasynyń baspasóz hatshysy.
«Nur Otan» partiiasynyń hatshysy Arman Qyryqbaev ta Facebook paraqshasynda birqatar oblystardan koronavirýspen kúresý úshin biýdjettik sala qyzmetkerlerin birkúndik jalaqylaryn aýdarýǵa májbúrlegen áreketterge shaǵymdanǵan hattar kelip túsip jatqanyn jazdy.
«Nur Otan» partiiasy mundai áreketterge úzildi-kesildi qarsy. Kerisinshe, dál qazirgidei qiyn jaǵdaida bastaryn qaterge tigip, aldyńǵy qatarda turǵan dárigerlerge, qoǵamdyq qaýipsizdikti qamtamasyz etetin politsiia qyzmetkerlerine, sondai-aq, jumystaryn qashyqtan isteýdi jalǵastyryp jatqan muǵalimderge qoldaý kórsetý qajet. Koronavirýspen birlesip kúresý úshin qarajat jinaýǵa tek iri biznes ókilderi ǵana shaqyryldy. Onyń ishinde, kómek qolyn sozýǵa ózderi niet bildirgen, eń bastysy, oǵan qarjylai múmkindigi barlar ǵana jumyldyryldy. Eger siz jumys berýshi tarapynan osyndai zańsyz áreketterge tap bolsańyz, bizge tómende kórsetilgen bailanystar arqyly dereý habarlaýyńyzdy ótinemiz«, - dedi partiia hatshysy.
