Qazaqstannyń BUU-daǵy arnaiy ókili, Senatorlar keńesi tóraǵasynyń orynbasary Birǵanym Áitimova «Nursultan Nazarbaev: Jahandyq aýqymdaǵy saiasatker» atty halyqaralyq konferentsiiasynda Elbasynyń tarihi tulǵa ekenin aitty, dep habarlaidy QazAqparat.
«Óz sózimdi Prezident Qasym-Jomart Toqaevtyń sózinen bastaǵym keledi: «Tarihtyń ózi kórnekti tulǵalardy qalyptastyrady. Biraq mundai kóshbasshylar da tarih túzedi». Nursultan Ábishuly Nazarbaev naq osyndai aýqymdy tarihi tulǵa! Jalpyulttyq kóshbasshy úsh onjyldyq ishinde zamanaýi Qazaqstandy qura aldy, memlekettik institýttar quryldy, memlekettik basqarý tetikteri jasaldy, taiaýdaǵy 30 jáne odan da kóp jylǵa arnalǵan maqsattar, ornyqty ekonomikalyq damý strategiiasy aiqyndaldy, «Máńgilik El» ulttyq kody usynyldy jáne syrtqy saiasi basymdyqtar naqty belgilendi», - dedi Birǵanym Áitimova.
Onyń aitýynsha, bul kúnderi jáne odan keiingi jyldary Tuńǵysh Prezident Nursultan Nazarbaevtyń atyna kóptegen mańyzdy, mándi jyly sózder aitylady.
Sonymen qatar, ol Elbasynyń úsh negizgi bastamasyn atap ótti: Semei iadrolyq poligonyn jabý, iadrolyq arsenaldan erikti túrde bas tartý, memlekettik shekarany halyqaralyq-quqyqtyq resimdeý.
«Birinshi bolyp iadrolyq qarýdy iemdenýden óz erkimen bas tartqan Prezident Nazarbaevtyń bedeli jańa Qazaqstannyń beibitshil jáne dáiekti basshysy retinde aiqyndaldy. Nursultan Ábishuly Nazarbaev iadrolyq derjava mártebesinen bas tartyp qana qoimai, AQSh, Resei, Qytai, Ulybritaniia men Frantsiianyń bes iadrolyq derjavasynan eldiń qaýipsizdigine kepildik berýdi talap etkenin atap ótken jón. Men Tuńǵysh Prezidentimizdi halyqaralyq uiymdar basshylary men shet memleketter basshylarynyń qalai qabyldaǵanyna birneshe ret kýá boldym. Olar Nursultan Nazarbaevqa iadrolyq qarýdy taratpaý jónindegi jahandyq protsestiń belsendi qatysýshysy retinde qurmet kórsetip, onyń dáiektiligi men qaýipsizdik salasyndaǵy seriktestigi úshin rizashylyq bildiredi. Elbasynyń jaqsy jeke qarym-qatynas ornata bilýi, harizmatikalyq tabiǵaty men súikimdiligi elge jaǵymdy imidj ákelip qana qoimai, sonymen qatar ulttyq múddelerdiń igiligin de arttyrdy, - dep atap ótti spiker.
Nursultan Nazarbaevtyń halyqaralyq jáne aimaqtyq qaýipsizdikti nyǵaitýǵa qosqan batyl úlesi týraly aita kelip, Birǵanym Áitimova halyqaralyq moiyndaý el ishindegi ulttyq órleýden kórinis tabatynyn atap ótti. Bul ózara bailanysty protsester. Qazaqstan halyqaralyq arenada óziniń biregei sýbektiligin bekitti.
.jpeg)