Foto: ashyq derekkóz
Elimizde bireýdiń ánin ruqsatsyz shyrqap, jazǵany men jasaǵanyn suraýsyz paidalanǵandar úsh júz myń teńge deiin aiyppul arqalap, alty jylǵa deiin bas bostandyǵynan aiyrylady.
"Informbiýro" jańalyqtar qyzmetiniń habarlaýynsha, Ádilet ministrligi búginde avtorlyq quqyqqa qatysty ákimshilik-jaýapkershilik engizýdi qarastyryp jatyr. Sondai-aq, taýar belgisin zańsyz paidalanǵandarǵa da jaza kúsheimek.
Jańa zań jobasynda avtordyń kez kelgen týyndysyn ruqsatsyz alyp, óz maqsatyna paidalanatyndarǵa jazany kúsheitý qarastyrylǵan. Zańsyz isi úshin azamattarǵa 295 myń 360 teńge aiyppul nemese úsh jyldan alty jylǵa deiin bas bostandyǵynan aiyrý kózdelgen. Atalmysh bastamamen kompozitor Áziz Baltabekuly da kelisedi. Ol jazany kúsheitý zańsyzdyqtardyń aldyn alýǵa sep bolady deidi.
"Bizde kóp jaǵdaida eshbir ruqsatsyz, árine kópke topyraq shashpaimyn, bári solai oryndaidy dep. Biraq basym kópshiligi ánderdi ruqsatsyz alady. Kaver dep jatady, tipti, kaver bolǵan kúnniń ózinde avtordan bir aýyz suralyp aýyzsha bolsyn ruqsatyn alý kerek. Tik-tokka ǵoi, ózimiz jai shyǵara saldyq qoi degen bardym, júrdim degen nárse durys emes qoi. Eger de avtorlyq quqyq máselesi qatańdatylyp, jaza kúsheise biraz bul júie ornyna keler dep óz basym esepteimin", –deidi kompozitor, ánshi Áziz Baltabekuly.
Meiramhanalar men karaokede oryndaýshy belgili bir avtordyń týyndysyn shyrqaý úshin mindetti túrde ujymdyq uiymdarmen shart jasasýy tiis. Shartqa sáikes shyǵarma iesine ai saiyn syiaqy berý mindetteledi. Sondai-aq, ministrlik taýar syrtyndaǵy tańbalardy zańsyz paidalaný áreketterine de shara qoldanbaq.
"Qazirgi tańda QR taýar tańbalaryn zańsyz paidalaný jáne jasandy taýar ónimderi naryqta keń taralýy ózekti másele bolyp otyr. Osyǵan sáikes QR Ádilet ministrligi qylmystyq kodekstiń 222-babyna sáikes, bundai taýarlardy paidalaný jónindegi qylmystyq jazany qatańdatpaq. Osylaisha, jaýaptylar jyl sońyna deiin aiyppuldyń jańa túrin engizbek. Ázirge zań jobasy pysyqtalyp jatyr", – deidi ádilet ministrligi ziiatkerlik menshik quqyǵy departamentiniń bas sarapshysy Botagóz Satjanova.
