Senat tóraǵasy Máýlen Áshimbaev senat kýlýarynda daýly tok-shoýǵa bailanysty pikir bildirip, baǵdarlama jýrnalisteri jazalana ma degen suraqqa jaýap berdi. Bul týraly "Ult aqparat" Stan.kz aqparat agenttigine silteme jasap habarlaidy.
"Bul máselege mádeniet jáne aqparat ministri Aida Balaeva óz baǵasyn berdi. Óitkeni ministrlik osyndai memlekettik arnalarmen jumys istep otyr. Sondyqtan tiisti baǵa berildi jáne bul tok-shoý jabyldy. Halyqtyń da pikiri eskerildi dep aitsaq oryndy. Osy tok-shoýdy durys uiymdastyra almaǵan arnada jumys isteitin qyzmetkerlerge de baǵa berilgen shyǵar. Ári qarai memlekettik arnalarda mundai másele men olqylyqtar bolmaidy dep sanaimyz", – dedi senat tóraǵasy.
Tilshiler senat spikerinen "Tok-shoý jabyldy, biraq qandai da bir jaza qoldanylýy kerek pe?" dep surady.
"Redaktsiianyń, "Habar" telearnasynyń ishinde de bul máselege bailanysty tiisti saraptama, sheshimder bolady dep oilaimyn. Óitkeni bul máseleni ministrlik baqylaýynda ustaidy. “Bul osymen bitti, jýrnalister, endi basqa jobamen ainalysyńdar” degen sheshim bola qoimaityn shyǵar. Óitkeni agenttik basshylyǵy da, ministrlik basshylyǵy da bul máseleniń jaýapkershiligin sezip otyr. Sol sebepti agenttik basshysy tarapynan tiisti sheshim bolady dep oilaimyn", – dedi Máýlen Áshimbaev.
Sonymen qatar tilshiler senat spikerinen “Salyq tóleýshiler esebinen kún kórip otyrǵan jáne osyndai mazmundaǵy baǵdarlamalardy daiyndaityn memlekettik arnalar qajet pe?” dep surady.
“Qazir bul taqyryp bizdiń qoǵam úshin ózekti jáne ótkir ekeni túsinikti. Biraq bir jaǵdaiǵa bola barlyq memlekettik arnany kinálaý durys emes shyǵar. Olar da ózderiniń belgili bir fýnktsiiasyn, iaǵni aqparattandyrý, eldegi jaǵdaidy jariialaý mindetin oryndap júr.
Qalypty elde ártúrli buqaralyq aqparat quraldary – memlekettik jáne memlekettik emes bolýy kerek. Qazaqstan zańyna sáikes jumys isteitin blogerler de qajet. Meniń oiymsha, taraptar ózderi úshin qorytyndy shyǵardy”, – dep atap ótti senat basshysy.
Aita keteiik, 12 naýryzda "Habar" arnasynyń "Biraq" otbasylyq tok-shoýynda turmystyq zorlyq-zombylyq kórgen áielge arnalǵan baǵdarlama kórsetildi. Tok-shoý kezinde júrgizýshiler turmystyq zorlyq-zombylyq kórgen áieldi kúieýimen tatýlasýǵa májbúrledi. Bul jaǵdai el arasynda synǵa ushyrap, daý týdyrdy. Keiinirek mádeniet jáne aqparat ministri Aida Balaeva baǵdarlama jabylǵanyn málimdedi.
