Strategiialyq josparlaý jáne reformalar agenttigi ulttyq statistika biýrosy eldegi infliatsiia týraly derekterdi jariialady, dep habarlaidy Sputnik Qazaqstan.
Resmi málimetke sáikes, 2022 jyldyń shildesinde azyq-túlik taýarlarynyń baǵasy ótken jylǵy shildemen salystyrǵanda 19,7%-ǵa ósti, azyq-túlikke jatpaityn taýarlardyń quny 14,2%-ǵa, aqyly qyzmetter 9,2%-ǵa kóterildi.
Azyq-túlik naryǵynda qumsheker 87,3%, basty piiaz 71,7%, un 36,6% qymbattady. Al sábiz baǵasy 29,6%, qyzylsha 25,2% tómendedi.
2022 jyldyń shildesinde (2021 jylǵy shildemen salstyrǵanda) azyq-túlikke jatpaityn taýarlardyń baǵasi14,2% ósti.
Jeke qoldanylatyn taýarlar – 26,3%, jýý jáne tazalaý zattary – 23,5%, turmys quraldary – 22,6%, qurylys materialdary – 20,5%, jihaz jáne úige qajetti zattar – 19,1%, avtomobilder– 15,2%, ydys – 14,8%, toqyma buiymdary – 11,5%, farmatsevtikalyq ónimder 9,7% qymbattady.
Bir jylda aqyly qyzmetter baǵasy 9,2% ósti. Keshendi demalý uiymdarynyń baǵasy – 19,1%, qoǵamdyq tamaqtandyrý qyzmetteri – 16,8%, densaýlyq saqtaý qyzmetteri – 15%, sanatorii qyzmetteri – 14,1%, shashtarazdar men jeke qyzmet kórsetý oryndary qyzmetteri – 13%, qonaq úi qyzmetteri 5,9% qymbattady. Jolaýshylar kóligi qyzmetteriniń quny 5,5% kóterildi.
Biýronyń baǵa statistikasy departamentiniń direktory Qýanyshbek Jaqypbekulynyń aitýynsha, turǵyn úi-kommýnaldyq qyzmetter salasynda tarifter qymbattaýmen qosa tómendegen.
"Byltyrǵy shildemen salystyrǵanda ótken shildede elektr qýaty – 2,4%, qoqys shyǵarý, taratý jelileri arqyly tasymaldanatyn gaz tarifi 1,8% joǵarylady, al ortalyqtan jylý berý qyzmetine tarif 2,3%-ǵa, ystyq sýǵa 1,3%-ǵa, sýdy burý úshin 0,5%-ǵa tómendegen", – dep atap ótti Qýanyshbek Jaqypbekuly.
