«Qazaqstandyq vaktsinaǵa ǵylymi baǵa klinikalyq zertteýlerdiń úshinshi fazasy aiaqtalǵannan keiin beriledi. Ortalyq kommýnikatsiialar qyzmetinde ótken brifingide Biologiialyq qaýipsizdik problemalary ǵylymi-zertteý institýtynyń bas direktory Kúnsulý Zakaria osylai aitty, dep habarlaidy QazAqparat.
«Qazirgi ýaqytta tek bizdiń el emes, búkil dúnie júzindegi vaktsinalar osy strategiiamen júrip kele jatyr. Endi úshinshi fazanyń aiaqtalýyn kútip, negizgi nátijeni kútýimiz kerek. Qazirgi ýaqytta aralyq kórsetkishter jaman emes», - dep atap ótti Kúnsulý Zakaria.
Onyń aitýynsha, otandyq ónimge, muǵalimder men dárigerlerge qoldaý bildirýimiz kerek.
«2020 jyldyń 20 naýryzynan bastap biz úsh aýysymdyq jumyspen toqtaýsyz, demalyssyz jumys istep jatyrmyz. BAQ ókilderi men áleýmettik jeli qoldanýshylary qazaqstandyq ǵalymdar týraly ne jazbai jatyr? Sizderden bir ǵana ótinish – bizge tym bolmaǵanda moraldyq turǵyda qoldaý kórsetińizder. Bul vaktsina – qazaqstandyq ǵalymdar shyǵaryp jatqan otandyq ónim. Bul jumysty jumyla atqarýymyz kerek. Úkimet kómektesip, qanshama qarjy bóldi. Biz aianbai jumys istep jatyrmyz. Vaktsinany synap kórý úshin maimyldar qajet boldy. Ony shetelden qalai aldyrǵanymyz týraly tipti kitap ta jazýǵa bolady. Bul jerde QR Ulttyq qaýipsizdik komiteti de, basqa da quziretti organdar kómektesti», - deidi ol.
