sýret ashyq derekkózden alyndy
Májilistiń jalpy otyrysynda depýtat Maqsat Tolyqbai gazdyń baǵasyna qatysty halyqtyń narazylyǵyn jetkizdi, dep habarlaidy Azattyq Ruhy.
«Almaty oblysy, Qarasai aýdanynda qalyptasqan kúrdeli áleýmettik jaǵdai men aýdannyń myńdaǵan turǵyndarynyń «Qazaqstan boiynsha tabiǵi gazǵa eń qymbat tarifpen tólep otyrmyz» degen shaǵymdary osy depýtattyq saýaldy jasaýǵa negiz boldy. Bizge Májilis depýtattaryna shuǵyl bailanysqa shyǵyp, habarlasqan 500-ge jýyq turǵynmen kezdesý úshin 2023 jyldyń 26 mamyrynda osynda kelip, turǵyndarmen kezdesý ótkizip, aryz-shaǵymdaryn tyńdadym. Máseleniń ýshyǵyp ketkeni sonshalyqty, bul daý sheshilmese, eki aptadan keiin myńdaǵan adam joldy jaýyp, jappai ereýilge shyǵatyndaryn eskertip otyr», - dedi ol.
Depýtat narazylyqqa sebep Qarasai aýdanyndaǵy Shamalǵan, Jandosov, Shalqar, Qairat, Eńbekshi, Qumaral, Úshterek sekildi ondaǵan eldimekendi, sondai-aq, «Arai» jáne «Darhan» saiajailaryn gazben qamtyp otyrǵan «Sigma Gaz» JShS-niń qojaiyndary baǵany qoldan kóterip, gazdyń qunyn 34,75 teńgege ósirýi bolǵanyn aitty.
«Al sol jerdegi basqa kompaniiadan gaz alatyn, irgesindegi Qaskeleń qalasynyń turǵyndary gazdyń bir tekshe metrine 26-27 teńgeden tólep otyr. Bul - óte úlken aiyrmashylyq. Qazaqstan Respýblikasynyń Ulttyq ekonomika ministrliginiń Tabiǵi monopoliialardy retteý komitetiniń Almaty oblysy boiynsha departamenti 2023 jyldyń qańtar, aqpan ailarynda «Sigma Gaz» JShS-niń qyzmetine jospardan tys tekserý júrgizip, birneshe zańbuzýshylyq faktilerdi anyqtaǵan. Anyqtap qana qoimai, Qazaqstan Respýblikasynyń Ákimshilik quqyq buzýshylyq týraly Kodeksiniń 164 jáne 167 baptaryna sáikes, «Sigma Gaz» JShS-ne qatysty 2 million teńge somasyna ákimshilik aiyppul salǵan. Tabiǵi monopoliialardy retteý komitetiniń Almaty oblysy boiynsha departamentiniń 2023 jylǵy 10 naýryzdaǵy buiryǵyna sáikes, gazdyń baǵasyn negizsiz kótergen atalǵan kompaniia shekti baǵa deńgeiin ár tekshe metrine 34,75 teńgeden 28,94 teńgege tómendetýge mindettep, artyq tólemdi tutynýshylarǵa qaitarý týraly sheshim shyǵarǵan bolatyn. Alaida, «Sigma Gaz» JShS bul sheshimdi áli oryndamady», - dedi ol.
Sondai-aq ol ataǵandai, turǵyndar «Sigma Gaz» JShS qubyrymen keletin kógildir otyndy úige kirgizgeni úshin tym kóp aqsha tóleitinderine narazy.
«Bir úidi gaz qubyryna qosý 450 myń teńgeden joǵary. Osy rette máseleni áleýmettik shieleniske jetkizbei, tez arada qajetti sheshim qabyldaýlaryńyzdy suraimyn», - dedi ol.
