Resei jáne ýkrainalyq pravoslav shirkeýiniń otyzdan astamy sviashennigi "Máskeý isi" boiynsha sottalǵandardy qoldap, ashyq hat jazdy. Hat mátini "Pravoslavie i mir" basylymynyń saitynda jariialandy.
Din qyzmetshileri hatta "Resei soty tipti odan da aýyr qylmys boiynsha aiyptalǵandarǵa jumsaq úkim shyǵaryp jatqan tusta" "Máskeý isi" boiynsha sottalǵandarǵa sýdianyń tym qatań jaza berýiniń sebebin túsinbei otyrmyz" dep jazǵan.
Hat avtorlary "miting ótkizý erejesin birneshe ret buzǵany úshin" tórt jylǵa sottalǵan belsendi Konstiantin Kotov pen "jappai tártipsizdik uiymdastyrdy" dep aiyptalǵan Aleksei Miniailony erekshe atap ótken. Olar Miniailony "qoǵamdyq-qaiyrymdylyq isterge belsene atsalysyp júrgen din jolyndaǵy adam" dep sipattaǵan.
Sviashennikter hatta "ótirik kýá bergenderdiń bul dúniede jazasyz qalmaitynyn" da eskertken. 52 din qyzmetshisiniń qoly qoiylǵan hatta olar "Máskeý isi" boiynsha sottalǵandardyń úkiminiń qaita qaralýyn talap etken. Qol qoiý áli jalǵasyp jatyr.
Shilde aiynyń sońynda Máskeý turǵyndary "ruqsat etilmegen mitingige" shyǵyp, "táýelsiz kandidattardy qalalyq dýma sailaýyna jiberýdi talap etken". Bul aktsiia kezinde politsiia 1300-den astam adamdy ustady. Eki kúnnen soń tergeý komiteti "jappai tártipsizdik uiymdastyrý" isi boiynsha qylmystyq is qozǵady. Bul is qoǵamda "Máskeý isi" degen atpen belgili.
Konstantin Kotov - osy is aiasynda aiyptalyp, sottalǵan belsendilerdiń biri. Qyrkúiek aiynyń basynda Tver soty "birneshe ret miting ótkizý erejesin buzǵany" úshin tórt jylǵa sottaǵan. Ol buǵan deiin saiasi tutqyndardy qoldap, jalǵyz adamdyq aktsiia da ótkizgen.
