رەسەي جەنە ۋكراينالىق پراۆوسلاۆ شٸركەۋٸنٸڭ وتىزدان استامى سۆياششەننيگٸ "مەسكەۋ ٸسٸ" بويىنشا سوتتالعانداردى قولداپ, اشىق حات جازدى. حات مەتٸنٸ "پراۆوسلاۆيە ي مير" باسىلىمىنىڭ سايتىندا جارييالاندى.
دٸن قىزمەتشٸلەرٸ حاتتا "رەسەي سوتى تٸپتٸ ودان دا اۋىر قىلمىس بويىنشا ايىپتالعاندارعا جۇمساق ٷكٸم شىعارىپ جاتقان تۇستا" "مەسكەۋ ٸسٸ" بويىنشا سوتتالعاندارعا سۋديانىڭ تىم قاتاڭ جازا بەرۋٸنٸڭ سەبەبٸن تٷسٸنبەي وتىرمىز" دەپ جازعان.
حات اۆتورلارى "ميتينگ ٶتكٸزۋ ەرەجەسٸن بٸرنەشە رەت بۇزعانى ٷشٸن" تٶرت جىلعا سوتتالعان بەلسەندٸ كونستيانتين كوتوۆ پەن "جاپپاي تەرتٸپسٸزدٸك ۇيىمداستىردى" دەپ ايىپتالعان الەكسەي مينيايلونى ەرەكشە اتاپ ٶتكەن. ولار مينيايلونى "قوعامدىق-قايىرىمدىلىق ٸستەرگە بەلسەنە اتسالىسىپ جٷرگەن دٸن جولىنداعى ادام" دەپ سيپاتتاعان.
سۆياششەننيكتەر حاتتا "ٶتٸرٸك كۋە بەرگەندەردٸڭ بۇل دٷنيەدە جازاسىز قالمايتىنىن" دا ەسكەرتكەن. 52 دٸن قىزمەتشٸسٸنٸڭ قولى قويىلعان حاتتا ولار "مەسكەۋ ٸسٸ" بويىنشا سوتتالعانداردىڭ ٷكٸمٸنٸڭ قايتا قارالۋىن تالاپ ەتكەن. قول قويۋ ەلٸ جالعاسىپ جاتىر.
شٸلدە ايىنىڭ سوڭىندا مەسكەۋ تۇرعىندارى "رۇقسات ەتٸلمەگەن ميتينگٸگە" شىعىپ, "تەۋەلسٸز كانديداتتاردى قالالىق دۋما سايلاۋىنا جٸبەرۋدٸ تالاپ ەتكەن". بۇل اكتسييا كەزٸندە پوليتسييا 1300-دەن استام ادامدى ۇستادى. ەكٸ كٷننەن سوڭ تەرگەۋ كوميتەتٸ "جاپپاي تەرتٸپسٸزدٸك ۇيىمداستىرۋ" ٸسٸ بويىنشا قىلمىستىق ٸس قوزعادى. بۇل ٸس قوعامدا "مەسكەۋ ٸسٸ" دەگەن اتپەن بەلگٸلٸ.
كونستانتين كوتوۆ - وسى ٸس اياسىندا ايىپتالىپ, سوتتالعان بەلسەندٸلەردٸڭ بٸرٸ. قىركٷيەك ايىنىڭ باسىندا تۆەر سوتى "بٸرنەشە رەت ميتينگ ٶتكٸزۋ ەرەجەسٸن بۇزعانى" ٷشٸن تٶرت جىلعا سوتتاعان. ول بۇعان دەيٸن ساياسي تۇتقىنداردى قولداپ, جالعىز ادامدىق اكتسييا دا ٶتكٸزگەن.
