Almatyda ondaǵan otbasy birneshe jyl buryn satyp alǵan baspanasynan aiyrylyp qalý qaýpimen betpe-bet keldi. Turǵyndardyń aitýynsha, qurylys kompaniiasy bir páterdi birneshe adamǵa satyp, keibir jyljymaityn múlikti bankke kepilge qoiǵan. Qazir bul derek boiynsha qylmystyq is tergelip jatyr, dep habarlaidy ult.kz.
Jábirlenýshilerdiń sózinshe, olar taýnhaýstardy qurylys endi bastalǵan kezde satyp alǵan. Alaida keiin ózderi ielik etemiz degen úilerdiń basqa adamdardyń atyna rásimdelgenin bilgen.
Keibir turǵyndar bul baspana úshin ipoteka rásimdese, endi biri barlyq jinaǵyn jumsaǵan, tipti burynǵy úiin satyp jibergen.
Turǵyndardyń biri Ásem Tóleýbaevanyń aitýynsha, ózi páterdi 70 million teńgege qolma-qol satyp alǵan.
«Biz bul páterdi zańdy túrde satyp aldyq. Keiin dál sol baspananyń basqa adamǵa da satylǵanyn bildik. Óz páterimizdi qaitaryp berýdi talap etemiz», – dedi ol.
Turǵyn úi kesheniniń qurylysy 2021 jyldyń qazan aiynda bastalǵan. Páterlerdiń bir bóligi irgetasy qalanbai turyp satylǵan. Baǵasy 40-70 million teńge aralyǵynda bolǵan. Satyp alýshylarmen aldyn ala satyp alý-satý sharttary jasalǵan. Keibiri tipti kiltin alyp, jóndeý jumystaryn bastap ketken.
Oral qalasynyń turǵyny Baǵdagúl Ájiǵalieva jalǵyz baspanasyn satyp, Almatydan 52 million teńgege taýnhaýs alǵanyn aitady. Keiin óz páteriniń basqa adamnyń atyna rásimdelgenin bilgen.
Taǵy bir turǵyn Tahmina Asanova aiaqtalmaǵan úige amalsyz kóship kirgenderin aitty. Onyń sózinshe, turǵyndar sý men elektr energiiasy úshin zańdy tulǵalarǵa arnalǵan joǵary tarifpen tóleidi. Qys ailarynda kommýnaldyq tólem aiyna 250-300 myń teńgege deiin jetken.
Advokat Anar Qatebaevanyń aitýynsha, satyp alýshylar negizgi satyp alý-satý emes, tek aldyn ala shartqa qol qoiǵan. Sondyqtan zań júzinde olardyń baspanaǵa menshik quqyǵy rásimdelmegen. Sonymen qatar qurylys salýshy jer telimin bankke kepilge qoiyp, nesiesin ótemegen.
Onyń málimetinshe, qazirgi tańda 22 páter bank kepilinde tur. Qurylys aiaqtalǵannan keiin de kompaniia úleskerlerdiń kelisiminsiz qujattardy rásimdep, páterlerdi ózge adamdardyń atyna tirkegen.
Almaty qalalyq politsiia departamentiniń resmi ókili Saltanat Ázirbektiń málimetinshe, asa iri kólemdegi alaiaqtyq faktisi boiynsha qylmystyq is qozǵalǵan.
«Sotqa deiingi tergeý barysynda kompaniianyń úsh qyzmetkeri kúdikti dep tanylyp, sot sanktsiiasymen qamaýǵa alyndy. Kinási dáleldense, olar múlki tárkilenip, 10 jylǵa deiin bas bostandyǵynan aiyrylýy múmkin», – dedi ol.
