Shaǵyn jáne orta biznes nysandary 2020 jyldyń 1 qazanyna deiin mindetti áleýmettik meditsinalyq saqtandyrý tólemderin tóleýden bosatyldy. Sonymen qatar, iri biznes sýbektileriniń birqatary 1 shildege deiin jarna tólemeitin boldy. Bul týraly «Áleýmettik meditsinalyq saqtandyrý qory» KEAQ Almaty qalalyq filialy málim etti, dep habarlaidy "Ult aqparat".
Filial taratqan málimetke súiensek, úkimet salyq pen áleýmettik tólemderden bosatylǵan shaǵyn jáne orta biznes nysandarynyń tizimin bekitti. Olardyń qatarynda saýda-sattyq, kólik tasymaly jáne tehnikalyq qyzmet kórsetý nysandary, bilim berý oryndary, meditsina, týrizm mekemeleri, meiramhana-qonaq úi jáne oiyn-saýyq salasy, baǵdarlamalyq qamsyzdandyrý, fitnes nysandary bar.
Sonymen qatar, jeńildikke jeke kásipkerler de ilindi. Atap aitqanda, kásipkerler qaramaǵyndaǵy qyzmetkerler úshin saqtandyrý tólemderin tóleý mindetinen bosatyldy. Biraq jeke kásipkerlik nysanynyń iesi retinde ózi úshin jarna tóleýi qajet. Degenmen olar úshin jarna tóleý merzimi biylǵy jyly maýsymnyń birine deiin shegerildi.
Jalpy alǵanda, bir millionǵa jýyq jumysker memlekettik áleýmettik saqtandyrý qoryna (MÁSQ) jarna men aýdarym tóleýden bosatyldy.
«Memleket tótenshe jaǵdai kezinde kásipkerlerdi qoldaý maqsatynda osyndai sharalardy qolǵa alyp otyr. Joǵaryda atalǵan sýbektiler jumys berýshi retinde aýdarym (jalaqynyń 2%) jasaýdy toqtatady. Oǵan qosa, jaldamaly jumyskerler jalaqysynan da jarna ustamaidy. Soǵan qaramastan, olardyń bári de mindetti áleýmettik meditsinalyq saqtandyrý paketindegi qyzmetterdi qajetinshe paidalana alady», - dedi Nurlybek Qabdyqaparov.
Al, úkimet qaýlysyna enbegen biznes nysandary jeńildikterdi paidalanyp, jarnalar men aýdarymdardy 1 maýsymnan keiin tólei alady.
N.Qabdyqaparov 1 qazanǵa deiin jarna tólemegeni úshin jinaqtalatyn qaryz jaiyn da túsindirdi. Aitýynsha, zań jarnalar men aýdarymdardy osy ýaqyt aralyǵynda tolyq toqtatyp tastaýǵa múmkindik bermeidi. Sondyqtan Meditsinalyq saqtandyrý qory ol máseleni sheshý joldaryn qarastyryp jatyr.
«Qazir biznes ókilderi úshin ońaiǵa soǵyp jatpaǵany belgili. Qor osyndai qiyn shaqta halyqqa qoldaý kórsetý maqsatynda jarna tóleý mindetinen «bosatylǵandardyń» atyna qaryz jinaqtalýyna jol bermeitin arnaiy quqyqtyq norma engizý týraly bastama kóterdi. Qazir osy ózgertýlerdi zańdyq turǵyda bekitý jumystary júrip jatyr, aldaǵy ýaqytta úkimet qaraýyna beriledi», - dedi filial direktory.
Tólemderden bosatylǵan sanattardyń tolyq tizimi QR Úkimetiniń 2020 jyly 20 sáýirdegi №224 qaýlysynda kórsetilgen.
