Foto: Polisia.kz
Mańǵystaý oblysy politsiia departamentiniń jedel basqarý ortalyǵyna sý tasqyny aimaǵynan evakýatsiialanǵan Qulsary qalasynyń turǵyndaryn qonaq úilerdiń birinde qarýly adamdar kepilge alyp, aqshalai syiaqy talap etýde degen qońyraý tústi, dep habarlaidy «Ult aqparat» Polisia.kz-ke silteme jasap.
Tekserý barysynda bul aqparat jalǵan bolyp shyqty.
Oblystyq PD ekstremizmge qarsy is-qimyl basqarmasynyń qyzmetkerleri qabyldaǵan sharalar nátijesinde Beineý kentinde jalǵan qońyraý shalǵany úshin 22 jastaǵy qyz ustaldy. Sonymen qatar onyń buǵan deiin avtobýsta uialy telefon urlaǵany anyqtaldy. Qoldy bolǵan gadjetten ol qońyraý shalǵan.
Qazirgi ýaqytta kúdiktige qatysty bóten múlikti urlaý jáne terrorizm aktisi týraly kórineý jalǵan habarlaý faktileri boiynsha sotqa deiingi tergeý júrgizilip jatyr.
Sol kúni Aqtóbe qalasynyń politsiiasyna er adam uialy telefonnan qońyraý shalyp, Grishin kóshesindegi úide bomba ornatylǵany týraly aitqan. Bul fakt te rastalmady.
Aqtóbe oblysy PD ekstremizmge qarsy is-qimyl basqarmasynyń qyzmetkerleri buryn da osyndai qylmys úshin sottalǵan Aqtóbe qalasynyń jumys istemeitin turǵynyn mas kúiinde ustady.
Oǵan qatysty terrorizm aktisi týraly kórineý jalǵan habarlaǵany úshin qylmystyq is qozǵaldy.
Jalǵan terrorizmniń úshinshi faktisi Almaty qalasynda tirkeldi. Onda qalanyń jeke kompaniialarynyń biriniń telefonyna WhatsApp messendjeri arqyly iri aqshalai syiaqy úshin saýda ortalyǵyna bomba qoiý týraly usynys kelip tústi.
Jedel-izdestirý is-sharalaryn ótkizý barysynda Jetisý oblysy PD EQIQB qyzmetkerleri Taldyqorǵan qalasynyń 9 jasar turǵynyn anyqtady. Ol internet jelisinde kompaniianyń jarnamasyn kórip, buzaqylyq nietpen osy habarlamany joldaǵany anyqtaldy.
Kámeletke tolmaǵan balanyń ata-anasy balany tárbieleý sharalaryn qabyldamaǵany úshin ákimshilik jaýapkershilikke tartyldy.
IIM Qylmystyq kodekstegi osy qylmys úshin 5 myń AEK (bul 18 mln teńgeden astam) mólsherinde aiyppul ne bolmasa bes jylǵa deiin bas bostandyǵyn shekteý nemese bas bostandyǵynan aiyrý kózdeletinin taǵy da eske salady.
Sondai-aq sot sheshimi boiynsha kináli adam jalǵan terrorizm aktisi saldarynan jeke jáne zańdy tulǵalarǵa keltirilgen zalaldy óteýge tiis.
