Foto: Facebook/"Qaztemirtrans"
"QazTemirTrans" laýazymdy tulǵalaryn zańsyz baiytýdyń qylmystyq shemasy áshkerelendi, - dep habarlaidy "Ult aqparat" Antikorǵa silteme jasap.
Jedel óńdeý nátijeleri boiynsha Qazaqstan Temir Joly enshiles kásiporyndary biriniń, atap aitqanda Qazaqstan Respýblikasy júk vagon parkiniń iri operatory bolyp tabylatyn "Qaztemirtrans" aktsionerlik qoǵamynyń laýazymdy adamdaryn zańsyz baiytýdyń qylmystyq shemasy ashylyp, joly kesildi.
"Qoǵamnyń jáne onyń óńirlik filialdarynyń laýazymdy tulǵalary júk vagondarynyń tapshylyǵyn paidalana otyryp, keibir jaǵdailarda osyndai tapshylyqty jasandy túrde jasai otyryp, problemalardy sheshýdiń ornyna, osy jaǵdaidy ózderiniń paidakúnemdik maqsattarynda paidalana otyryp, júk vagondaryn kedergisiz jáne jedeldetip bergeni úshin kásipkerlerden júieli negizde para alǵany anyqtaldy.
Turaqty para alýdyń belgilengen shemasyna filialdardyń qyzmetkerleri men basshylary, sondai-aq bas keńse bólimsheleriniń menedjerleri men bastyqtary qatysty", - delingen habarlamada.
Aqsha qarajattary, ádette, laýazymdy tulǵalardyń nemese olardyń senimdi adamdarynyń, onyń ishinde jaqyn týystarynyń kart-shottaryna aýdarylyp otyrǵan.
"Qoǵamnyń Aqmola filialynyń bir ǵana basshysy 2020 jyldan bastap 70 million teńgeden astam qarajatty zańsyz alyp, onyń basym bóligin Shýche-Býrabai kýrorttyq aimaǵynyń oiyn mekemelerine júieli túrde barý arqyly jumsaǵan.
Qoǵamnyń Qaraǵandy filialynyń burynǵy jáne qazirgi basshylary da osyndai qylmystar jasady dep kúdikke ilindi" - delingen Antikor málimetinde.
Barlyq atalǵan adam ustaldy jáne tergeý sotynyń sanktsiiasymen 2 aiǵa qamaýǵa alyndy.
"Sondai-aq, aqshalai qarajatty zańsyz alýda Qyzylorda filialynyń basshysy men Qoǵamnyń ortalyq apparatynyń birqatar qyzmetkerleri áshkerelendi.
Basqa laýazymdy tulǵalardyń qatysýy tekserilip jatyr.
Aita ketsek, júk vagondarynyń ýaqtyly jetkizilmeýine bailanysty júk jóneltýshi kásiporyndar jetkizilimderdiń buzylýyna jol beredi, úlken shyǵyndarǵa ushyraidy jáne para berý arqyly óz máselelerin sheshýge júginýge májbúr. Sonymen qatar, bul shyǵyndardyń barlyǵy taýarlar baǵasynyń ósýine áser etedi", - delingen habarlamada.
QR QPK-niń 201-babyna sáikes tergeý múddesinde ózge de aqparat jariialaýǵa jatpaidy.
