Ulytaý oblysynyń bilim basqarmasynyń basshysy Seifýra Tólekova Jelide taraǵan videodaǵy Sátbaev qalasyndaǵy № 25 orta mekteptiń matematika pániniń muǵalimi men oqý isiniń meńgerýshisi arasyndaǵy janjaldyń jai-japsaryn aityp berdi, - dep habarlaidy Tengrinews.kz agenttigi.
"Olardyń arasyndaǵy kikiljiń 10-synyp oqýshysynyń, iaǵni oqý isi meńgerýshisiniń týysynyń baǵasyna bailanysty týyndaǵan. Oqýshy birinshi toqsanda matematikadan 4 alyp, basqa sabaqtardan 5 alǵan. Sondyqtan ata-anasy mektep direktoryna habarlasyp, matematikadan qoiylǵan baǵany qaita qaraýdy ótingen. Direktor mektep muǵalimderimen, onyń ishinde matematika pániniń muǵalimimen áńgimelesip qyzǵa qosymsha tapsyrmalar berilgen. Biraq oqýshy tapsyrmalardy oryndaý barysynda synyptaǵy taǵy eki balamen birdei qateler jibergen. Muǵalim olarǵa bir-birinen kóshirip alǵanyn aitqan. Oqýshy qyz aitylǵan syndy ózine qabyldap apaiyna aitqan", - dedi Seifýra Tólekova.
Oqýshylardyń biri túsirgen video Jelide taraǵannan keiin mektepte pedagogikalyq keńes otyrysy ótti. Bilim basqarmasynyń orynbasary da bilim oshaǵyn aralady.
"Keńeste biz janjaldyń barlyq mán-jaiyn anyqtadyq, jalpy sheshimmen oqý isiniń meńgerýshisine qatań sógis jariialandy, ol orynbasarlyq qyzmetinen bosatyldy. Eńbek zańnamasy boiynsha ony jumystan bosatýǵa quqyǵymyz joq", - dep qosty Seifýra Tólekova.
