QR Eńbek jáne halyqty qorǵaý ministrligi ataýly áleýmettik kómektiń jańa sharttaryn túsindirdi. Oǵan sáikes, 21 myń teńgelik járdemaqyǵa kópbalaly otbasylar ǵana emes, bir balasy bar analar da ilige alady, dep habarlaidy QazAqparat tilshisi.
«Ataýly áleýmettik kómek kópbalaly jáne az qamtylǵan otbasylarǵa berilýi shart. Bul - Prezidenttiń tapsyrmasy. Al áleýmettik jaǵynan az qamtylǵan otbasyda bir bala nemese eki bala bolýy múmkin ǵoi. Ondai otbasylardyń bir ailyq tabysy adam basyna shaqqanda 20 789 (kúnkóris minimýmnyń 70 protsenti - avt.) aspasa, bir balaǵa 21 myń teńgege jýyq járdemaqy taǵaiyndalady», - dedi ministrliktiń baspasóz qyzmetkerleri.
Osy oraida mamandar bir balasy bar otbasyna jańa járdemaqy tóleýge qatysty mysaldy da keltirdi. Máselen, bir áiel jalǵyz balasyn asyrap otyr. Al onyń bir ailyq jalaqysy 40 000 teńgeni quraidy. Osy aqshany eki adamǵa bólgende týra 20 000 myńnan keledi. Demek, otbasynyń bir ailyq tabysy adam basyna shaqqanda kúnkóris minimýmnyń 70 protsenti - 20 789 teńgeden aspaidy. Zań boiynsha balaǵa 21 myń teńgeniń járdemaqyny tólenýi kerek.
«Al anasyna 20 000 men 20 789 teńgeniń aiyrmashylyǵy tólenedi. Sonda balanyń járdemaqysyn qosqanda atalǵan otbasy ai saiyn 22 myń teńgege jýyq ataýly áleýmettik kómekti alyp turady», - dep atap kórsetti mamandar.
Aita keteiik, «Nur Otan» partiiasynyń XVIII sezinde QR Prezidenti Nursultan Nazarbaev kópbalaly otbasylarda árbir balanyń tólemaqysyn 21 myń teńgege deiin arttyrýdy tapsyrdy. «Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeitýdi tapsyramyn. Atalǵan kórsetkishti kúnkóris deńgeiiniń 70 paiyzyna deiin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deiin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondai otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áitpese, sonyń bárin sanaǵanda kópbalaly otbasylar jaǵdai jaqsy azamattar bolyp shyǵa keledi», - degen bolatyn N.Nazarbaev. Jaqynda Memleket basshysy atalǵan sharalardy 1 sáýirden bastaýdy mindettedi.
QR Eńbek jáne xalyqty áleýmettik qorǵaý ministri Berdibek Saparbaev balalarǵa beriletin 21 myń teńgeden bólek ata-anasyna da qosymsha aqy tólenetinin jetkizdi. Búginde elimizde kúnkóristiń minimýmy 29 698 teńgeni quraidy. Osy ýaqytqa deiin ataýly kómekti bir adamǵa shaqqanda kúnkóris deńgeiiniń 50 protsentinen, iaǵni 14 849 teńgeden aspaityn otbasylar alsa, endi Prezidenttiń tapsyrmasy boiynsha atalǵan kórsetkish 70 protsentke - 20 789 teńgege deiin kóterilip otyr. Demek, kópbalaly otbasynyń jalpy tabysyn árbir adamǵa bólgende aqshanyń somasy kúnkóris deńgeiiniń 70 protsentine, iaǵni 20 789 teńgege jetpese, árbir balaǵa 21 myń teńgeniń járdemaqysy beriledi.
«Sosyn eger januianyń árbir adamyna shaqqanda tabys kúnkóris deńgeiinen (70 protsentten - avt.) tómen bolsa, aiyrmashylyq 10 myń teńge bola ma, 7 myń teńge bola ma, sol ata-anasyna da qosymsha tólenedi. Odan keiingi eń úlken jeńildik, buryn tabysty eseptegende «Altyn alqa» «Kúmis alqa», kóp balaǵa beriletin járdemaqy, múgedekterdiń járdemaqysy men stipendiiasy sanalatyn. Endi, sonyń bárin esepke almaidy», - deidi B.Saparbaev.
