Búgin elimizde oqýshylardyń on bir jyldyq bilimin tekseretin ulttyq biryńǵai testileý bastaldy. Astanada UBT úsh pýnkte ótip jatyr. Sputnik Qazaqstan tilshisi UBT-nyń alǵashqy kúni qalai bastalǵanyn óz kózimen kórý úshin Eýraziia ulttyq ýniversitetinde bolyp qaitqan.
Ýniversitet aldy tańǵy segizden mektep formasyn kigen ul-qyzdarǵa toly boldy. Báriniń kózderinde qorqynysh pen qýanysh, úmit pen úrei.
Biri kún-tún demei daiyndalǵan synaqtyń búgin bitetinine qýansa, endi biri testileýden keiingi ómirine alańdaityndai.
Bul joly tekserýshiler qyzdar men uldardy eki bólek esikten kirgizip, tekserdi. Túlekterdiń barlyǵy derlik telefondy kórinbeitindei, metal ramkadan ótkende "signal" shyqpaityndai jasyryp alǵan. Dese de metall ramkany "aldaý" ońai emes. Ishke úmitpen kirgen oqýshylar qaita shyǵyp, tyqqan telefondaryn ata-anasyna, ustazdaryna tapsyryp jatty.
Uiymdastyrýshylardyń aitýynsha, bir bala tipti on uialy telefonmen ustalǵan.
"Uialy telefon, shpargalkanyń kóptiginen túlekterdi tekserip, ishki kirgizý uzaq ýaqytty aldy", — deidi olar.
Eýraziia ulttyq ýniversitetiniń tórt qabatty korpýsynda 13 mekteptiń túlekteri UBT tapsyryp jatyr. Barlyǵy 12 aýditoriia jabdyqtalǵan. Balalaryna qoldaý bildirý úshin birge ere kelgen ata-analar qazir syrtta UBT-nyń ótý barysyn onlain baqylap otyr. Dese de bir ekranǵa eki-úsh aýditoriiany "tyǵyp qoiǵany" ata-analarǵa qiyndyq týǵyzyp jatqan syńaily. On eki aýditoriia úshin nebary bes-alty ekran qoiylǵan.
"Ekrannan balamdy kórý múmkin emes. Tipti ol otyrǵan aýditoriia da kórinbeidi. Bir monitorda úsh-tórt aýditoriiany bólip kórsetedi, Durys oilastyrmaǵan múlde",- dep ashýlandy elorda turǵyndarynyń biri.
Ýniversitet oramynda jedel járdem brigadasy da tur. Korpýs ishinde de meditsinalyq qyzmetkerler bar, deidi uiymdastyrýshylar.
Tańǵy toǵyzda bastalýy kerek bolǵan UBT ýaqytynan jarty saǵatqa keshikti. Esikter saǵat tili toǵyz jarymdy kórsetkende bir-aq jabyldy.
