بٷگٸن ەلٸمٸزدە وقۋشىلاردىڭ ون بٸر جىلدىق بٸلٸمٸن تەكسەرەتٸن ۇلتتىق بٸرىڭعاي تەستٸلەۋ باستالدى. استانادا ۇبت ٷش پۋنكتە ٶتٸپ جاتىر. Sputnik قازاقستان تٸلشٸسٸ ۇبت-نىڭ العاشقى كٷنٸ قالاي باستالعانىن ٶز كٶزٸمەن كٶرۋ ٷشٸن ەۋرازييا ۇلتتىق ۋنيۆەرسيتەتٸندە بولىپ قايتقان.
ۋنيۆەرسيتەت الدى تاڭعى سەگٸزدەن مەكتەپ فورماسىن كيگەن ۇل-قىزدارعا تولى بولدى. بەرٸنٸڭ كٶزدەرٸندە قورقىنىش پەن قۋانىش, ٷمٸت پەن ٷرەي.
بٸرٸ كٷن-تٷن دەمەي دايىندالعان سىناقتىڭ بٷگٸن بٸتەتٸنٸنە قۋانسا, ەندٸ بٸرٸ تەستٸلەۋدەن كەيٸنگٸ ٶمٸرٸنە الاڭدايتىنداي.
بۇل جولى تەكسەرۋشٸلەر قىزدار مەن ۇلداردى ەكٸ بٶلەك ەسٸكتەن كٸرگٸزٸپ, تەكسەردٸ. تٷلەكتەردٸڭ بارلىعى دەرلٸك تەلەفوندى كٶرٸنبەيتٸندەي, مەتال رامكادان ٶتكەندە "سيگنال" شىقپايتىنداي جاسىرىپ العان. دەسە دە مەتالل رامكانى "الداۋ" وڭاي ەمەس. ٸشكە ٷمٸتپەن كٸرگەن وقۋشىلار قايتا شىعىپ, تىققان تەلەفوندارىن اتا-اناسىنا, ۇستازدارىنا تاپسىرىپ جاتتى.
ۇيىمداستىرۋشىلاردىڭ ايتۋىنشا, بٸر بالا تٸپتٸ ون ۇيالى تەلەفونمەن ۇستالعان.
"ۇيالى تەلەفون, شپارگالكانىڭ كٶپتٸگٸنەن تٷلەكتەردٸ تەكسەرٸپ, ٸشكٸ كٸرگٸزۋ ۇزاق ۋاقىتتى الدى", — دەيدٸ ولار.
ەۋرازييا ۇلتتىق ۋنيۆەرسيتەتٸنٸڭ تٶرت قاباتتى كورپۋسىندا 13 مەكتەپتٸڭ تٷلەكتەرٸ ۇبت تاپسىرىپ جاتىر. بارلىعى 12 اۋديتورييا جابدىقتالعان. بالالارىنا قولداۋ بٸلدٸرۋ ٷشٸن بٸرگە ەرە كەلگەن اتا-انالار قازٸر سىرتتا ۇبت-نىڭ ٶتۋ بارىسىن ونلاين باقىلاپ وتىر. دەسە دە بٸر ەكرانعا ەكٸ-ٷش اۋديتورييانى "تىعىپ قويعانى" اتا-انالارعا قيىندىق تۋعىزىپ جاتقان سىڭايلى. ون ەكٸ اۋديتورييا ٷشٸن نەبارى بەس-التى ەكران قويىلعان.
"ەكراننان بالامدى كٶرۋ مٷمكٸن ەمەس. تٸپتٸ ول وتىرعان اۋديتورييا دا كٶرٸنبەيدٸ. بٸر مونيتوردا ٷش-تٶرت اۋديتورييانى بٶلٸپ كٶرسەتەدٸ, دۇرىس ويلاستىرماعان مٷلدە",- دەپ اشۋلاندى ەلوردا تۇرعىندارىنىڭ بٸرٸ.
ۋنيۆەرسيتەت ورامىندا جەدەل جەردەم بريگاداسى دا تۇر. كورپۋس ٸشٸندە دە مەديتسينالىق قىزمەتكەرلەر بار, دەيدٸ ۇيىمداستىرۋشىلار.
تاڭعى توعىزدا باستالۋى كەرەك بولعان ۇبت ۋاقىتىنان جارتى ساعاتقا كەشٸكتٸ. ەسٸكتەر ساعات تٸلٸ توعىز جارىمدى كٶرسەتكەندە بٸر-اق جابىلدى.
