QR Eńbek jáne xalyqty áleýmettik qorǵaý vitse-ministri Svetlana Jaqypova kimderdiń zeinetaqysy qalai kóteriletinin túsindirip berdi, dep xabarlaidy "Ult aqparat".
"1 shildeden bastap bazalyq zeinetaqyny taǵaiyndaý tártibi ózgeredi. Memlekettik biýdjetten tólenetin bazalyq zeinetaqynyń mólsheri eńbek ótili men zeinetaqy júiesine qatysý merzimine táýeldi bolady. Búginde bazalyq zeinetaqy barlyǵyna birdei tólenip otyr. Al onyń mólsheri eń tómengi kúnkóris deńgeiiniń 54 protsentin quraidy. Ol - shamamen 15 274 teńge. Endi, shilde aiynan bastap bazalyq zeinetaqy eńbek ótili men zeinetaqy júiesine qatysý merzimine qarai tólenedi", - dedi S.Jaqypova Astanada ótken baspasóz máslixatynda.
Onyń aitýynsha, búginde qaita esepteý sharalary atqarylyp, árbir adamnyń zeinetaqysy avtomatty túrde belgilendi. Sondyqtan qosymsha qujattardy ákelýdiń qajeti joq.
Aita keteiik, Memleket basshysy Nursultan Nazarbaev biylǵy Joldaýda bazalyq zeinetaqyny eńbek ótiline qarai 1,8 esege ulǵaitýdy tapsyrǵan bolatyn. Búginde respýblika boiynsha bazalyq zeinetaqyny 2 mln-nan astam adam alyp otyr.
"Máselen, 1998 jylǵa deiin adamnyń 20 jyldyq eńbek ótili bar. Odan keiin ol taǵy da 20 jyl jumys istep, zeinetaqy jinaqtaý júiesine qatysty. Barlyǵy - 40 jyl. Ondai zeinetkerler bazalyq zeinetaqynyń 100 protsentin alady. Al zeinetkerdiń eńbek ótili bolmasa, sosyn zeinetaqy jinaqtaý júiesine múldem qatyspasa, ia bolmasa, eńbek ótili 10-aq jyl bolsa, oǵan jańaǵy eń tómengi kúnkóris deńgeiiniń 54 protsentin - 15 274 teńgeni tóleidi. Negizi, 10 jyldan keiin árbir jylǵa 2 protsent qosylady. Sonda 33 jyldyq eńbek ótili bar adam da bazalyq zeinetaqynyń 100 protsentin ala alady. Árbir adam óziniń zeinetaqy mólsherin "elektrondy úkimet" portalynan, ia bolmasa, "Azamattarǵa arnalǵan úkimettiń" front-keńselerinen bile alady. Sol jerde tolyq anyqtamany da alýǵa múmkindik bar", - dep atap kórsetti S.Jaqypova.
