QR Qorǵanys ministri Rýslan Jaqsylyqov Qazaqstanda áskeri parad uiymdastyrýǵa qatysty týraly pikir bildirdi, dep habarlaidy QazAqparat.
«Qazirgi ýaqytta Qazaqstan Qarýly Kúshteriniń aldynda mańyzdy mindetter tur. Olardy Joǵarǵy Bas qolbasshy aiqyndap berdi. Bárin júzege asyrý jáne biýdjetten qarajat suraý – bárin shyǵyn. Máselen, janar-jaǵarmai materialdary, issapar shyǵyndary, jeke quramnyń tamaqtanýy bar. Jaqynda ǵana oqý-jattyǵýdy aiaqtadyq. Munda bizge qaisysy mańyzdy – oqý-jattyǵý ótkizip, jaýyngerlik ázirligimizdi tekserý me álde sherý jasaý ma? Bul rette biz Joǵarǵy Bas qolbasshynyń tapsyrmalaryn iske asyrýdy eskerip, Qarýly Kúshterdiń jaýyngerlik daiyndyǵymen ainalysqan oryndy dep sanaimyz», - dedi Qorǵanys ministri Májilis otyrysynan keiin tilshilerge bergen suhbatynda.
Ministr 7 mamyr – QR Qarýly Kúshteri kúni men 9 mamyrdy shatastyrmaý qajettigin aitty.
«Sherý Jeńis Kúnine emes, Qarýly Kúshterdiń 30 jyldyǵyna arnalǵan edi. Bul aiyrmashylyqty salystyryp kórińizder. Jeńis kúnine ardagerlerimizge qurmet kórsetetin is-sharalar josparlanǵan. Olardyń bári ótkiziledi. Atqarýshy bilik organdary ardagerlerge josparly túrde tólem jasaidy. Biz olarǵa qurmet kórsetemiz jáne quttyqtaimyz», - dep atap ótti Jaqsylyqov.
Sonymen birge vedomstvo basshysy «Qazaqstan budan bylai parad ótkizbeitin boldy ma?» degen suraqqa jaýap berdi.
«Bárimiz túsinemiz, sherý ótkizý – patriottyq sezimdi kórsetýdiń bir joly. Buǵan deiin pandemiia bolǵanyn bilesizder, onda sherý jasaityn qajettilik bolmady. Al qazir biz jaýyngerlik ázirlikti arttyrýmen ainalysyp jatyrmyz. Kelesi jyly ekonomikalyq jaǵdaiymyz múmkindik berip jatsa, sherý ótkizemiz. (...) Jalpy bir sherý ótkizýge orta eseppen 4 mlrd teńgeden astam qarjy jumsalady», - dep túsindirdi Qorǵanys ministri.
Aita keteiik, biyl Nur-Sultan qalasynda Jeńis kúnine arnalǵan áskeri parad uiymdastyrylmaidy.
Qorǵanys ministrligi muny biýdjet qarajatyn únemdeý úshin, sondai-aq basqa da mindetterdi sheshý qajettigine bailanysty dep túsindirdi.
