Aýa raiynyń sýytýyna bailanysty Qazaqstan joldarynda kólik apaty kóbeidi. Bul týraly QR Ishki ister ministrliginiń resmi ókili Nurdildá Oraz málimdedi, dep habarlaidy "Ult aqparat".
«Bir aptada jalpy sany 209 jol-kólik oqiǵasy oryn aldy, saldarynan 40 adam qaza taýyp, 235 adam jaraqat aldy. Sýyq túsken kezeńde jol ústindegi qozǵalysqa asa muqiiat qaraǵan jón. Qaýipsizdik maqsatynda Ishki ister ministrligi alys saparlardy aýa raiy jaǵdaiyna qarai josparlaýǵa shaqyrady. Tuman men boran boljanǵan kúnderi qala syrtyna shyqpaýǵa keńes beredi», - dedi Nurdildá Oraz áleýmettik jelide ótken onlain brifingte.
Sonymen birge, resmi ókil bir aptada jalpy sany 3424 qylmys tirkelgenin atap ótti. Politseilerdiń jedel áreket etýi nátijesinde 2198 qylmys izi sýymai ashyldy. Onyń ishinde19 adam óltirý, 38 tonaý jáne 513 urlyq faktileri áshkere boldy.
