Densaýlyq saqtaý ministri Aleksei Tsoi Qazaqstanda qansha oqýshy koronavirýs juqtyrǵany týraly málimetti bólisti, dep habarlaidy "Ult aqparat".
«Oqý jylynyń basynan bastap mektep oqýshylary arasynda koronavirýs juqtyrýdyń 1741 jaǵdaiy tirkeldi. Onyń ishinde kezekshi synyptarǵa tirkelgen balalar arasynda 482 bala juqtyrǵan. Bul oflain rejimdegi oqýshylardyń jalpy sanynyń 0,05% quraidy. Odan bólek qashyqtan oqityn 1259 bala koronavirýs infektsiiasyn juqtyryp alǵan», - dedi Aleksei Tsoi Ortalyq kommýnikatsiialar qyzmetinde ótken baspasóz máslihatynda.
Onyń aitýynsha ótken aptada ǵana 12 oblysta kezekshi synyptarda oqityn oqýshylar arasynda 129 jaǵdai tirkelgen.
«Ókinishke qarai, halyq qaitadan beiqamdyqqa boi aldyryp barady. Biz áleýmettik araqashyqtyqty saqtamai, maska kiiýdi qoidyq», - dedi Aleksei Tsoi.
Eske sala ketsek Aleksei Tsoi buǵan deiin «Qazaqstanda jeltoqsan nemese qańtar ailarynda qatań karantin sharalary engizilýi múmkin be» degen suraqqa jaýap bergen bolatyn.
«Apta saiyn málimetterdi zerttep, aldaǵy kezeńderge de boljam jasap jatyrmyz. Qazir kórip otyrǵanymyzdai, Qazaqstanda karantin sharalaryn jeltoqsan nemese qańtar ailarynda engizý máselesi jaǵdaidy qanshalyqty baqylaýda ustai alatynymyzǵa bailanysty bolady. Qazir koronavirýs órshigen keibir óńirde juqtyrý deńgeii tómendep kele jatqanyn baiqap otyrmyz. Shyǵys Qazaqstanda máselen jaǵdai rettelip, juqtyrý deńgeiiniń tómendeý tendentsiiasyn baqylaýdamyz», - dedi Aleksei Tsoi.
