QR Indýstriia jáne infraqurylymdyq damý ministri Jeńis Qasymbek óz qyzmetkerlerine jemqorlyq úshin jumystan shyǵaratyn eskertti, dep xabarlaidy QazAqparat tilshisi.
«Ótkende QR Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaevpen kezdeskende biz bylai kelistik. Eger aýmaqta bir basshy ustalsa, onda osy salaǵa jaýapty komitet tóraǵasy nemese onyń orynbasary otstavkaǵa ketýi kerek. Qazir biz agenttikpen birlesip jumys istep jatyrmyz. Bálkim, ortaq bir qujatty qabyldaimyz. Alaida budan bylai mende osyndai ustanym bolady. Máselen, bir salanyń basshysy paramen ustalsa, komitet tóraǵasynyń orynbasary jumysta ketýi tiis. Al jergilikti jerde inspektor qolǵa tússe, birden departament basshysy jumystan ketedi», - dedi J.Qasymbek búgin Astanada ótken jiynda.
Ministrdiń aitýynsha, ondai ustanymmen basshylardyń jeke jaýapkershiligi artady. Sonda jergilikti jerdegi qarapaiym inspektordan bastap komitet basshylyǵyna deiingi qyzmetkerler jemqorlyqtyń jazasyn túsinedi.
J.Qasymbek óz jaýapkershiligin de atap ótti.
«Búgin men ýáde beremin, inspektor paramen ustalsa, departament direktory jumystan qýylady. Al departament basshysy ustalsa, komitette ózgerister bolady. Ortalyq apparatta da solai bolady. Onyń bári maǵan da qatysty», - dep atap kórsetti J.Qasymbek.
Aita keteiik, búgin QR Indýstriia jáne infraqurylymdyq damý ministrliginde ortalyq apparat pen aýmaqtyq qurylymdardyń qyzmetkerleri jemqorlyqqa qarsy kúres sharalarymen tanysty. QR Memlekettik qyzmet isteri jáne sybailas jemqorlyqqa qarsy is-qimyl agenttiginiń ókilderi osy salada paramen ustalǵandardy kórsetip, qylmystyq jazaǵa tartý jaiynda aityp berdi.
Sol jerde ministr J.Qasymbek óz qyzmetkerlerine eskertý jasady.
«Biz birqatar sharalardy qolǵa alatyn bolamyz. Men osyny aldyn ala aityp qoiaiyn. Osy jyldyń ishinde kóliktik inspektsiiada qaita qurylymdaý bolady. Oǵan qatysty fýnktsiialardyń kóbisi avtomattandyrylǵan júiege aýystyralady. Sóitip, jolda turatyn mamandardy barynsha azaitamyz. Adamdar jolda turmaidy. Al qalǵan fýnktsiialardy basqa memlekettik organdarǵa beremiz. Sóitip, kóliktik inspektsiiany túbegeili ózgertemiz. Sondyqtan qazir jyldyń basynda eskertip qoiaiyn dep otyrmyn. Kóliktik inspektsiiany tolyǵymen attestatsiiadan ótkizemiz. Biz jergilikti jerde inspektorlardyń sanyn 30-40 protsentke qysqartýdy josparlap otyrmyz. Sol sebepti jumysty ózgertińiz. Áitpese, sizdermen qoshtasamyz. Basqa qurylymdarǵa da aitarym osy», - dep atap kórsetti J.Qasymbek.
