Belgili qoǵam belsendisi, sarapshy, AmalBooks baspasynyń jetekshisi Baqytjan Buqarbai ulttyq keńes músheliginde óziniń barlyq bilimi men tájiribesin halyq iigiligine jaratpaq niette ekenin aitty, dep habarlaidy QazAqparat tilshisi.
Onyń aitýynsha, Ulttyq keńes qoǵamdaǵy ózekti máselelerdi sheshýde mańyzdy ról atqarmaq.
«Jurtshylyqtyń, qoǵamnyń, azamattyq qoǵam ókilderiniń, partiialardyń keńinen talqylaýy negizinde memlekettik saiasattyń ózekti máseleleri boiynsha usynystar men usynymdardy tujyrymdaý mindetimiz bolmaq. Bilik azamattyq qoǵam ókilderimen birlese otyryp, ózekti máselerge qatysty sheshimderdi birlese anyqtap, birlese qabyldaý dep alyp otyr negizgi maqsatyn. Bul - quptarlyq nárse. Meniń nemen ainalysatynymdy, qandai másele usynarymdy ázirge dóp basyp aita almaimyn. Alǵashqy otyrys bolatyn tamyz aiyna deiin kóteretin másele aiqyndalady», - dedi Baqytjan Buqarbai.
Ol keńeske ózin usynbaǵanyn jetkizdi.
«Men buǵan deiin de qoǵamdyq máselelermen ainalysyp kelgenmin. Biz osyǵan deiin 4 jyldan beri myń adamǵa qazaq tilin úirettik. 3 jyldai qazaq jastarynyń arasynda el arasynda kitap oqýdy qaitadan trendke ainaldyrý úshin júgirip júrmin. Osy baǵytta bilimim, tájiribem bar. Birneshe kitabym shyqty. Qazaqstan strategiialyq zertteý institýtynda 3 jyldai qyzmet ettim. Analitikalyq tájiribem bar. Osy baǵyttaǵy bilim men tájiribemdi el igiligine jaratamyn dep aita alamyn. Men eshqashan ózimdi usynǵan emespin. Meni kim usynǵanyn da bilmeimin», - dedi ol.
