Almatyda QR Bilim jáne ǵylym ministri Erlan Saǵadiev muǵalimder arasyndaǵy respýblikalyq «Panorama pedagogicheskih idei» baiqaýynyń jeńimpazdaryn marapattady, dep habarlaidy QazAqparat tilshisi.
«Órleý» Biliktilikti arttyrý ulttyq ortalyǵy» AQ Memleket basshysynyń joldaýyna sáikes QR BǴM tapsyrysymen respýblikalyq «Panorama pedagogicheskih idei» atty baiqaý uiymdastyrǵan bolatyn.
Onda mektepke deiingi muǵalimderge, orta, tehnikalyq, kásibi jáne joǵary oqý oryndarynyń muǵalimderine arnap beinesabaqtar men beinedárister irikteldi.
«Elimizdiń bilim salasyna negizdelgen osyndai aýqymdy baiqaý birinshi ret uiymdastylyryp otyr. Respýblikamyzdyń barlyq muǵalimderi birinshi ret óz tájiribesimen bólisý múmkindigin aldy. Baiqaý aimaqtyq jáne respýblikalyq degen eki kezeńnen turdy. Aimaqtyq kezeńge 2 750 muǵalim qatysty. Al respýblikalyq kezeńge 940 beinesabaq usynyldy, onyń ishinde 66 beinesabaq 22 nominatsiiaǵa ilikti», - dedi «Órleý» ókilderi.
Búgin saltanatty jiynda QR BǴM basshysy jeńimpazdardy marapattady. Ol osy syndy konkýrstardyń elimizdiń bilim salasyna ákeler paidasyn eskere otyryp, barlyq qatysýshylarǵa alǵysyn bildirdi. Ekinshi oryn iegerlerin Qazaqstannyń Eńbek Eri, pedagogikalyq eńbek ardageri Aiagúl Mirazova, al úshinshi oryn alǵan muǵalimderdi «Órleý» Biliktilikti arttyrý ulttyq ortalyǵy» AQ basqarmasynyń tóraiymy Gúlnas Ahmetova marapattady.
Úzdik jumystardy «Órleý» uiymynyń Iýtýb kanalynda kórýge bolady. Qazirgi ýaqytta kanalda 32 myń jazylýshy bar. Onda 1500 film júktelgen.
