QR Bilim jáne ǵylym vitse-ministri Sholpan Karinovanyń qatysýymen mektep oqýlyqtarynyń sapasy tóńiregindegi máselelerge arnalǵan alqaly otyrys ótti, dep habarlaidy "Ult aqparat" vedmostvonyń Facebook-tegi resmi paraqshasyna silteme jasap.
«Qazaqstan Respýblikasynyń Prezidenti Qasym-Jomart Toqaev halyqqa arnaǵan Joldaýynda oqýlyq sapasyna basa nazar aýdaryp, oqýshylardy sapaly oqýlyqtarmen qamtamasyz etý – tiisti ministrliktiń tikelei mindeti ekendigin aitqan bolatyn. Osy rette Bilim jáne ǵylym ministrligi tarapynan bul baǵytta naqty sharalar qabyldanýda», - dedi vitse-ministr.
Jiynǵa qatysýshylar jańartylǵan mazmundaǵy oqýlyqtardy ázirleý, saraptamadan ótkizý jáne oqý úrdisinde paidalaný boiynsha atqarylyp jatqan sharalar týraly aqparat berdi. Dóńgelek ústel barysynda orta bilim berýdiń jańartylǵan mazmundaǵy úlgilik oqý baǵdarlamalaryna sai ázirlenip, 2016-2017 oqý jylynan bastap mektepterge engizilip jatqan oqýlyqtar men oqý-ádistemelik keshenderdiń tujyrymdamalyq erekshelikteri boiynsha kásibi túsiniktemeler berildi.
Alqaly otyrysta atalǵan oqýlyqtardyń mazmunyn qurastyrý boiynsha avtorlardyń, ǵylymi-pedagogikalyq turǵyda baǵalaý boiynsha sarapshylardyń qyzmeti jan-jaqty talqylandy.
Oqýlyqtardy ázirleý, saraptaý jáne tańdap alý júiesi, oqýlyqtar sapasyn jetildirý baǵytyndaǵy Qazaqstan Respýblikasynyń Bilim jáne ǵylym ministrliginiń osy kezge deiin atqarǵan jumystary áńgime arqaýyna ainalyp, aldaǵy ýaqyttarǵa josparlanyp otyrǵan naqty sharalar sóz boldy. Ashyq dialog formatynda ótken shara barysynda jiynǵa qatysýshylar óz usynystaryn da bildirdi.
Atalǵan sharaǵa Y.Altynsarin atyndaǵy Ulttyq bilim akademiiasy jáne «Oqýlyq» respýblikalyq ǵylymi praktikalyq ortalyǵynyń qyzmetkerleri, oqýlyq avtorlary men sarapshylary qatysty.
Aita keteiik, Bilim jáne ǵylym ministri Ashat Aimaǵambetov oqýlyqtardyń sapasyn jaqsartýdyń tómendegidei 10 qadamyn usynǵan bolatyn:
1. Muǵalimderdi iriktep, arnaiy kýrstar ótkizý jáne olardy oqyǵandyǵy jaily kýálandyrý. Qatysýshylardyń turaqty bazasyn qalyptastyrý. Sarapshylar men pándik komissiialardyń quramyna enetin sarapshylardy málimetter bazasynan jasyryn ádispen tańdap alý.
2. Oqýlyqtar avtorlaryn kýrstan ótkizý.
3. Saraptama júrgizý protsesin jaqsartý. Sarapshylar turaqty túrde oqýlyqpen jumys istei alatyn arnaiy platforma ashý.
4. Elektrondy platforma arqyly baspalarǵa aitylǵan eskertýlerdiń nátijesin baqylaý. Ár eskertýge naqty jaýap bolýy tiis.
5. Oqýlyqtardyń retsenziiasymen jasyryn jumys isteidi. Oqýlyqtardy saraptaý kezinde sarapshylar oqýlyqtyń avtory kim ekenin bilmeidi jáne osylaisha qurastyrýshy tarapynan kórsetiletin qysymnan bosatylady.
6. Oqýlyqtarda qate jiberilgen jaǵdaida, baspa óz qarajatyna oqýlyqtardy almastyrady.
7. Baspa qatelerdi jóndemegen jaǵdaida belgili bir sanktsiialar qoldanylady.
8. Ministrlik oqýlyqtardyń óz baǵasyna jasalatyn taldaýdy baqylaýda ustaidy.
9. Oqýlyqtardyń kólemin kishireitý.
10. Belgili bir oqýlyqtardaǵy qate baǵdarlamalardy jóndeý.
