Qazaqstan bilim jáne ǵylym ministriniń keńesshisi Erbolat Muhamedjan Shymkentte tabylǵan esirtki pritonyna qatysty málimdeme jasady, dep habarlaidy "Ult aqparat".
"Qazaqstannyń birneshe buqaralyq aqparat quralynda Shymkent qalasy ýniversitetteriniń biriniń sport kesheninde jedel is-sharalar júrgizý kezinde esirtki pritony tabylǵany týraly jańalyq jaryq kórdi. Atalǵan fakti boiynsha ol jekemenshik oqý orny ekenin habarlaimyz. Joǵarǵy oqý ornyna memlekettik bilim berý tapsyrysy berilmegen", - dep atap ótti ministrdiń keńesshisi.
Muhamedjannyń aitýynsha, bolǵan jaittyń mán-jaiyn anyqtaýǵa baǵyttalǵan qajetti jedel-tergeý sharalary júrgizilip jatyr.
"Qylmystyq kodekstiń "Esirtki, psihotroptyq zattardy, olardyń analogtaryn tutynýǵa arnalǵan priton uiymdastyrý nemese ustaý, sondai-aq osy maqsatta oryn-jai berý" baby boiynsha aldyn ala tergeý júrgizilýde", - dep atap ótti ministrdiń keńesshisi.
Qylmystyq kodekstiń bul 302-baby boiynsha 3 jyldan 12 jylǵa deiin bas bostandyǵynan aiyrý jazasy qarastyrylǵan.
Aita keteiik, 19 shildede "Habar 24" memlekettik telearnasy Shymkent ýniversitetteriniń biriniń sport zalynan politsiia qyzmetkerleri esirtki pritonyn tapqanyn habarlady. Jumys ornynda oqý ornynyń qyzmetkeri marihýana satqan.
