QR Bilim jáne ǵylym ministrligi tekserý jumystaryna kedergi keltirgeni úshin «Astana» ýniversitetine qatysty ákimshilik hattama toltyryp, sotqa joldady, dep habarlaidy QazAqparat tilshisi.
Hattama QR Ákimshilik quqyq buzýshylyqtar kodeksiniń 462-baby, 2-bóligi (Memlekettik inspektsiialar men memlekettik baqylaý jáne qadaǵalaý organdarynyń laýazymdy adamdaryna óz qyzmettik mindetin oryndaýyna kedergi keltirý, qaýlylardy, nusqamalardy jáne ózge de talaptardy oryndamaý, bir jyl ishinde qaitalanǵan áreketter) boiynsha jazylǵan.
«Astana» ýniversitetine qatysty búgingi tekserý jumystaryna kedergi keltirý jóninde hattama toltyryldy. Bizdiń qyzmetkerler aldyna ýniversitettiń birde-bir basshysy shyqqan joq. Ótinishte kórsetilgen máeleler boiynsha suraǵan qujattar berilgen joq. Sol sebepti, Ákimshilik quqyqbuzýshylyqtar týraly kodekske sáikes, hattama toltyrylyp, búgin-erteń sotqa jiberiledi. Quqyqbuzýshylyq bir jyl ishinde qaitalanǵany úshin aiyppul kólemi 2-3 esege ósýi múmkin», - dedi QR BǴM Bilim jáne ǵylym salasyndaǵy sapany qamtamasyz etý komiteti tóraǵasynyń orynbasary Ǵalymjan Jumashev.
Onyń aitýynsha, sot sheshimi shamamen 2 apta ishinde shyǵýy tiis. Sot óz sheshimimen ministrliktiń tekserý júrgizýin, barlyq qujattardyń kórsetilýin mindettei alady.
Sonymen birge, Ǵ. Jumashev «Ýniversitettiń litsenziiasy ýaqytsha toqtatylýy múmkin be? Stýdentterdiń jaǵdaiy ne bolmaq?» degen suraqqa jaýap berdi.
«Búgin ýniversitette tekserý júrgizgen joqpyz, óz jumysymyzdy aiaqtai almadyq. Litsenziiany ýaqytsha toqtatý úshin bizdiń komitettiń qaýlysy shyǵýy kerek. Qaýly shyǵarý úshin tekserý jumystaryn júrgizý qajet. Búgin hattama jiberip, sot sheshimin kútemiz. Al stýdentter oqýyn ári qarai jalǵastyra beredi. Bul protsess olardyń oqýyna áser etpeidi. Al ministrlikke ótinish bergen 14 stýdenttiń máselesi sheshilmei qaldy», - dep jaýap berdi Ǵ. Jumashev.
Aita keteiik, búgin QR Bilim jáne ǵylym ministrligi «Astana» ýniversitetine jospardan tys tekserýdi bastady. Oǵan 14 stýdenttiń shaǵymy negiz boldy.
Stýdentter ýniversitette oqytýshy joqtyǵyn, ǵylymi jetekshilerdi jumystan bosatyp, olardyń ornyna basqa maman bekitilmegenin, basqa JOO-ǵa aýysqysy kelgen stýdentterdiń qujattary berilmegenin aityp shaǵymdandy.
