Jańa oqý jylynan bastap Qazaqstan mektepterinde ekologiialyq bilim beretin mindetti synyp saǵattary men fakýltativ sabaqtar engiziledi. Bul týraly bilim jáne ǵylym ministri Ashat Aimaǵambetov málimdedi, dep habarlaidy Sputnik Qazaqstan.
Aimaǵambetov Qazaqstan prezidenti Qasym-Jomart Toqaev Úkimettiń keńeitilgen otyrysynda mektepterde balalarǵa ekologiialyq bilim beretin pán engizýdi tapsyrǵanyn eske saldy.
Bilim ministrliginiń basshysy qazir salalyq vedomstvo aldynda elimizdiń mektepterinde jańa pándi shuǵyl túrde engizý mindeti turmaǵanyn atap ótti.
"Asyqpaýymyz kerek. Bizdiń aldymyzda Memleket basshysynyń tapsyrmasyn sapaly oryndaý mindeti tur. Ol úshin biz qabyldaityn sharalar men baǵdarlama keshendi bolýy tiis", - dedi Aimaǵambetov.
Ministr birinshi qyrkúiekten bastap mektepterde ekologiialyq bilim berý taqyryby boiynsha fakýltativter men synyp saǵatyn kóbeitý josparlanyp otyrǵanyn aitty.
Buǵan deiin Qazaqstannyń aqparat jáne qoǵamdyq damý ministri Aida Balaeva mektepterde jańa pán engizbes buryn elimizdiń joǵary oqý oryndaryndaǵy bilim berý baǵdarlamalaryn qaita qaraý qajettigin aitqan edi.
