QR Bilim jáne ǵylym ministrligi Ashat Aimaǵambetov orynbasarlarynyń Facebook-tegi paraqshalaryn jariia etti, dep habarlaidy "Ult aqparat".
«Memleket basshysy memlekettik qyzmetkerlerge áleýmettik jelilerdi paidalana otyryp, halyqpen tiimdi jumys júrgizýdi tapsyrdy. Qasym-Jomart Toqaev «estitin memleket» tujyrymdamasyna kóshý qajettigin erekshe atap ótken bolatyn. Shyn máninde, turǵyndar úshin qoljetimdi bolý – basshynyń eń basty mindetteriniń biri bolyp sanalady. Sybailas jemqorlyqqa qarsy saiasattyń negizi - memlekettik organ men basshynyń ashyqtyǵyn qamtamasyz etý dep aitsaq, búgingi tańda atalǵan baǵytta aitarlyqtai jumystar júrgizilýde», - dep jazdy Bilim ministri Facebook-tegi paraqshasynda.
Eń aldymen ministr búginde qoǵamdaǵy ózekti máseleler boiynsha azamattardyń pikiri eskerilip, ońtaily sheshimder qabyldanyp jatqanyn atap ótedi. Osy rette, ashyqtyq qaǵidaty aiasynda QR BǴM-nyń áleýmettik jelilerdegi resmi paraqshalaryna nemese ministrliktiń qyzmetkerlerine bilim jáne ǵylym salasyna qatysty tikelei saýal joldaýǵa bolatyndyǵyn qaperge salady.
«Bilim jáne ǵylym vitse-ministrleriniń Feisbýktegi paraqshalary da Sizder úshin árdaiym ashyq jáne qoljetimdi. Fatima Nadyrqyzy Jaqypova - Bilim jáne ǵylym vitse-ministri, Bibigúl Amangeldiqyzy Asylova – Bilim jáne ǵylym vitse-ministri, Rústem Aidarbekuly Biǵari – Bilim jáne ǵylym vitse-ministri.
Ekinshiden, Qazaqstan Respýblikasynyń Bilim jáne ǵylym ministrliginde (87172) 742411 nómiri boiynsha call-ortalyq halyqqa qyzmet kórsetedi. Sonymen qatar, óńirlerdegi bilim basqarmalary basshylarynyń Facebook-tegi akkaýnttary men bilim basqarmalarynyń call-ortalyqtary da turǵyndar úshin qoljetimdi», - dedi ol.
Ashat Aimaǵambetovtiń atap ótýinshe, úshinshiden, jumystyń ashyqtyǵy men aiqyndyǵyn qamtamasyz etý maqsatynda jýyrda QR BǴM-ǵa qarasty front-ofis iske qosylady. Kózdelgen basty maqsat - bilim salasyna qatysty kelip túsetin suraqtarǵa mardymdy jaýaptar qaitaryp, kúrmeýi qiyn máselelerdiń sheshilýine úles qosý.
«Tórtinshiden, óńirlerdegi bilim berý basqarmalaryna BAQ tarapynan kelip túsetin saýaldarǵa ýaqytyly jaýap berip, bilim berý taqyrybyn keńinen jariialaityn baspasóz qyzmetin qurý tapsyryldy. Jalpy kózdegen maqsatymyz – halyqqa qyzmet kórsetý barysynda jeke jáne ákimshilik kedergilerdi joiý. Sebebi, azamattarǵa yńǵaily jaǵdai jasaý jáne ashyq jumys júrgizý óte mańyzdy», - dedi ministr.
