Qazaqstannyń bilim jáne ǵylym ministri Ashat Aimaǵambetov oqytýshylardyń jappai jumystan shyǵarylýyna bailanysty Narhoz ýniversitetinde tekseris bastalǵanyn habarlady, dep jazady Sputnik.
"Bilim jáne ǵylym salasyndaǵy baqylaý komiteti azamattardyń shaǵymyna bailanysty jumys júrgizip jatyr. Bul resmi túrde oryndalyp, prokýratýra organdarynda tirkeledi", - dep habarlady bilim ministri.
JOO-daǵy tekseris nátijelerin Aimaǵambetov 15-16 tamyzda habarlaýǵa ýáde berdi.
Narhozdaǵy shý
Bir apta buryn Narhozdyń burynǵy oqytýshylary JOO rektoryna shaǵymdanyp, bilim jáne ǵylym ministrine aryz jazdy.
Olar ýniversitettiń qazirgi rektory – AQSh azamaty Endriý Vahteldiń bilim berý strategiiasyna narazylyǵyn bildirdi.
"Rektor jinalysta qazaq jáne orys tili páni oqytýshylaryn on jyldan keiin kórmeýge úmittenetinin aitty. Onyń pikirinshe, bul pánder Qazaqstan ekonomikasy salasy úshin mamandar ázirleýge qajet emes", - delingen aryzda.
Oqytýshylar jazǵandai, rektor bilim berý kýrstarynyń birinde oqýlyq paidalanýǵa tyiym salyp, stýdenttiń "ózi jetýi kerek" dep túsindirgen.
Sonymen qatar Qazaqstan tarihynyń durys oqytylmaýy da pedagogtardyń ashýyn keltirip otyr. Olardyń sózine júginsek, rektor postkeńestik keńistikte turyp jatqan ult ókilderin mensinbei sóileidi eken.
Narhoz oqytýshylarynyń jazǵan aryzy men bilim ministriniń bergen jaýabyn myna silteme arqyly tolyǵyraq oqi alasyz.
Ministrlik aryzdy oqyp, Narhozda osy jaitqa qatysty tekseris júrgiziletinin aitty.
