QR Bilim jáne ǵylym minstrliginiń apparattyq jiynynda vedomstvo basshysy Ashat Aimaǵambetov baiandamashylardyń daǵdarystyq jaǵdailarda tek formaldy esep berýlerin synǵa aldy. Sondai-aq, ministr Oral qalasyndaǵy jastardyń toptasyp tóbelesýi men Aqtóbede oryn alǵan oqiǵalarǵa qatysty pikirin bildirdi, dep habarlaidy "Ult aqparat".
«Máselege tereń úńilip qarap, saldary neden bolyp jatyr degenge jaýap bere almaisyzdar. Bári atústi, formaldy túrde. Naqty jumysqa kelgende balalar tóbelesip jatqanyn kóremiz. Tárbie jumysy qaida? Árbir osyndai jaǵdailardy biz kerek bolsa arnaiy jinalystarda qarastyramyz» - dedi ministr.
Ministrdiń sózine qaraǵanda, balalar arasynda jiilep ketken quqyq buzýshylyqtar, onyń ishinde toptasyp tóbelesý faktileriniń kóbeiýi osyndai oqiǵalarǵa formaldy qarap, istiń shyǵý sebebin anyqtamaýdan týyp otyr. Bul rette, vedomstvo basshysy arnaiy komissiialardyń qurylyp, jaǵdaidy jan-jaqty qaraý qajettigine erekshe toqtaldy.
Ministr jaýapty qyzmetkerlerge aldaǵy ýaqytta jalpy aqparat qana usynbai, naqty máselege bailanysty jan-jaqty taldaý júrgizip, oń sheshimin tabýdy tapsyrdy.
