Bilim jáne ǵylym ministri Ashat Aimaǵambetov Nur Otan partiiasynda qoǵamdyq qabyldaý ótkizdi. Sol jerde oǵan astanadaǵy bir mektepte jumys istegen jas maman aryzdandy, dep habarlaidy Sputnik Qazaqstan.
"Men №70 mektep-litseiinde jumys istedim. Ol jerge jas maman bolyp baryp, bir jyl qyzmet ettim. Synybym da boldy, saǵatym da boldy. Al bir jyldan keiin direktor maǵan saǵat ta, synyp ta bermei qoidy. Sebebin suraǵanda eńbek ótili joǵary muǵalimdi alamyn dedi. Maǵan birneshe jyl tálimgerlik jasaýǵa keńes berdi. Al men sabaq bermesem, keri ketip qalmaimyn ba? Tym bolmasa, 9 saǵat suradym. Ol kisiniń aitqan jaýaby - "Daje ne mechtai!", - deidi jas muǵalim Aijan Jaqsylyq.
Onyń aitýynsha, mektepte saǵat bermegennen keiin jumystan ketýge májbúr boldy. Al direktor eńbek ótili joǵary adamdy emes, jas mamandy jumysqa qabyldapty. Aijannyń mamandyǵy – qazaq tili jáne ádebieti pániniń muǵalimi. Úsh jyl buryn Taraz memlekettik pedagogikalyq ýniversitetin qyzyl diplommen bitirgen.
Osy oraida Bilim ministri qazaq tili jáne ádebieti páni muǵalimderine qatysty mańyzdy bir máseleni qozǵady.
"Qazirgi kezde osy mamandyq boiynsha ýniversitetterde óte kóp adam daiyndalyp jatyr. Biraq jumys oryndary jetkiliksiz. Sondyqtan qazaq tili mamandarynyń jumyssyzdyq máselesi bar. Sosyn qazaq tili mamandyǵyna aqyly negizde óte kóp adam oqyp júr", - deidi Aimaǵambetov.
Bilim ministri jas mamanǵa kómek beriletinin jetkizdi. Jaqyn arada astanada jańa mektep ashylady. Aijandy sol jerge jumysqa alatyn boldy.
"Qazan aiynda jańa mektep ashylady. Sizdi sol jerge mindetti túrde jumysqa alady. Sondai sheshim qabyldadyq. Sonda baryńyz, qujatty tapsyryp, jumys isteńiz. Óitkeni maman qyzyl diplommen bitirse, ony jumyssyz qaldyrýǵa bolmaidy. Jańa mektepke daiyndalyńyz", - dep atap kórsetti Aimaǵambetov.
