Bilim jáne ǵylym ministri Ashat Aimaǵambetov «Muǵalimderdiń quqyǵyn buzý jaǵdailary qandai óńirlerde jii kezdesedi?» degen suraqqa jaýap berdi, dep habarlaidy QazAqparat.
«Ókinishke qarai, muǵalimderdiń quqyǵyn buzý jaǵdailary óńirlerdiń kóbinde kezdesip jatady. Baqylaý boiynsha komitet mundai buzýshylyqtarǵa birden jaýap qatýǵa tyrysady. «Pedagog mártebesi týraly» zańdy qabyldasaq, bizde qarjylyq jaýapkershilikti júktei alatyndai naqty normalar bolady. Pedagogtardyń quqyǵyn buzý jaǵynan qandai da bir óńir nemese qala «kóshbasshy» dep dál qadap aita almaimyn. Sebebi, búl ádiletsiz bolady. Ádistemelik turǵyda da qandai da bir óńirdi ajyratyp, atai almaimyz», - dedi Bilim jáne ǵylym ministri Úkimet otyrysynan keiin tilshilerge.
Ministrdiń aitýynsha, bala mektepke kirgenge deiin jaýapkershilik ata-anada bolady.
«Biz bárin de mektepten talap etpeýimiz kerek. Kez kelgen muǵalim óz synybyndaǵy 25 nemese 30 balany artynan júgirip, kóshede júrmeýi kerek. Ol – ata-ananyń jaýapkershiligi. Ata-ana mektepke alyp kelip, muǵalimge tapsyrýy tiis. Qazir biz mektepterde arnaiy týrniketter bolýyn qamtamasyz etip jatyrmyz. Iaǵni, geonavigatsiia arqyly balanyń mektepke kirgenin anyqtai alamyz. Qandai da bir oqys jaǵdailar mektep ishinde, oqý kezinde bolyp jatsa, iá, onda jaýapkershilik bilim salasynda», - dedi ministr.
Eske sala ketsek, búgingi Úkimet otyrysynda Ashat Aimaǵambetov muǵalimderdi ózine tán emes qyzmetke tartqandarǵa 120 AEK-ke deiin aiyppul salynatynyn habarlaǵan bolatyn.
