Elimizdegi mazmuny jańartylǵan oqýlyqtardyń sapasy synǵa ushyraǵan bolatyn. Osy máselege qatysty QR Parlamenti Senatynda orta bilim berý júiesiniń problemalaryna arnalǵan parlamenttik tyńdaýda QR Bilim jáne ǵylym ministri Erlan Saǵadiev túsinikteme berdi, dep habarlaidy Baq.kz tilshisi.
«Endi orys tili oqýlyǵy men Petrýshevskaianyń ertegilerine toqtalaiyn. Qazirgi tańda BAQ bul týraly kóp jazýda. Birinshiden, 9 aida sarapshylar, muǵalimder, qyzyǵýshylyq tanytqan ata-analardan 5 myń usynys kelip tústi. Olar osy ertegilerge qatysty eshqandai usynys bildirgen joq. Sebebi, bul (ertegi – avtor) 2004 jyldan beri orys tili oqýlyǵynda júr. Oqýshy atalǵan oqýlyq boiynsha 1,2 myńnan astam tapsyrmadan bar-joǵy 6 ǵana tapsyrma alady», - dedi ol.
Sonymen qatar ministr atalǵan oqýlyqty Reseidiń sarapshylary joǵary baǵalaǵanyn aitty.
«Biz prezidenttiń tapsyrmasyna sáikes oqýlyqtardyń mazmunyn jańartyp jatyrmyz. Biz balany barlyq nárse týraly, tipti óziniń ana tili jaiynda oilanýǵa májbúrleimiz. Narazylyq bildirýdi ádetke ainaldyryp aldyq. Ótken jyly da solai boldy. Alaida 18 million adam bir orynda turyp qalmaý úshin qoldan kelgendi jasaimyz», - dedi Erlan Saǵadiev.
Aita keteiik, daýly oqýlyqtar máselesi Aqordada QR Prezidenti Nursultan Nazarbaevtyń jýrnalistermen ótken kezdesýinde de kóterilgen bolatyn. Elbasy atalǵan máselege arnaiy tapsyrma beretinin aitqan.
Esterińizge sala keteiik, osyǵan deiin 5-synyp oqýshylarynyń ata-analary mazmuny jańarǵan orys tilindegi oqýlyqtardyń mazmuny syn kótermeitinin aityp, shý shyǵarǵan edi.
