QR Bilim jáne ǵylym ministri Ashat Aimaǵambetov qashyqtan bilim berýge qatysty call-ortalyqtyń operatory retinde jumys istep kórip, azamattardyń suraǵyna jaýap berdi, dep habarlaidy "Ult aqparat" ministrdiń Facebook-tegi paraqshasyna silteme jasap.
Ashat Aimaǵambetov Bilim jáne ǵylym ministrligi men halyq arasynda ornatylǵan keri bailanys tetikteri týraly jazdy.
Solardyń biri oqýshylardyń qashyqtan oqytý formatyna kóshýine bailanysty iske qosylǵan 1450 qysqa nómiri de bar.
«Jedel jelige kóptegen suraqtar kelip túsedi. Buǵan ótken aptada túski úzilis ýaqytynda orynbasarlarymmen birge ózim «operator qatarynda jumys istep», kóz jetkizdim. Suraqtardyń basym bóligi qashyqtan oqytýǵa, jalaqynyń qalai tólenetinine qatysty boldy. Biz Call-ortalyqqa túsken qońyraýlarǵa mamandarmen birge birinshi basshylardyń da jaýap berýi tájiribesin odan ári jalǵastyrýdy josparlap otyrmyz», - dep jazdy ministr.
Vedomstvo basshysynyń aitýynsha, Bilim jáne ǵylym ministrligi tótenshe jaǵdai kezinde kommýnikatsiianyń ózge de túrli quraldaryn paidalanýda. Ministrlik pedagogtermen, ata-analarmen jáne sarapshylarmen únemi bailanysta bolýǵa tyrysady. Sebebi konstrýktivti saýaldarǵa jyldam ári mazmundy jaýap berý – mańyzdy.
«Olar – dástúrli BAQ, tanymal internet-platformalar, áleýmettik jelilerdegi paraqshalarymyz, Call-ortalyǵy, onlain-konferentsiialar, arnaiy chattar men basqa da formattar.
Keri bailanys ornatý barysynda ótken jyldyń kúzinde iske qosylǵan Call-ortalyq erekshe ról atqarýda. Sonymen qatar, biz Whatsapp-chattardy jáne Telegram-arnalaryn tiimdi qoldanamyz.
Ministrliktiń Telegram-daǵy @edu_news_qz arnasy búgingi kúni 200 myńǵa jýyq aýditoriiaǵa ie, sondai-aq «Bala qorǵaý» @bala_qorgau arnasy keri bailanysty qamtamasyz etýde.
Mektep direktorlarymen, ádistemelik kabinet, aýdandyq jáne qalalyq bilim berý bólimderiniń, bilim basqarmalarynyń basshylarymen, JOO prorektorlarymen jáne rektorlarymen, ǵylymi uiym basshylarymen jeke chattarymyz bar.
Sondai-aq, meniń tapsyrmam boiynsha óńirlerdegi bilim basqarmalarynyń, bilim salasynda sapany qamtamasyz etý departamentiniń jáne JOO basshylary áleýmettik jelilerde paraqshalaryn ashyp, belsendilik tanytýda», - dedi ol.
A.Aimaǵambetov atap ótkendei, mundai jumys formaty týyndaǵan suraqtarǵa dereý jaýap, túsiniktemeler berýge, qajetti aqparatty tez arada alýǵa jáne jetkizýge múmkindik beredi.
