2025 jylǵa qarai mektepterdegi oryn tapshylyǵy 670 myńdy quraidy. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Mańyzdy baǵyttardyń biri – infraqurylymdy damytý. Qazirgi ýaqytta elimizde 34 apatty jáne 137 úsh aýysymdy mektep jumys isteidi. 2025 jylǵa qarai oryn tapshylyǵy 670 myń orynǵa jetedi dep boljap otyrmyz. Bul máseleni sheshý úshin 800 jańa mektep salynady. Tek qana osy jyldyń sońyna deiin 200 jańa mektepti paidalanýǵa berý qajet. Aimaqtar tiisti josparmen qamtamasyz etildi. Búgingi kúni jumys qarqyndy júrip jatyr», - dedi ministr.
Onyń atap ótýinshe, jekemenshik mektep jelisin arttyrý óte mańyzdy. Sońǵy eki jylda elimizde 41 myń oqýshyǵa arnalǵan 126 jekemenshik mektep ashyldy.
«Bul buǵan deiin ashylǵan jekemenshik mektepterdiń sanynan 2 ese kóp ekenin atap ótkim keledi. Qazirgi ýaqytta ministrlik ákimdiktermen birlesip, 800 mektepti salý jol kartalaryn jasaýda. Ol úshin 4 mehanizm qoldanylady: memlekettik-jekeshelik áriptestik, jekemenshik mektepter jelisin damytý, memlekettik biýdjetten nysanaly qurylys jáne modýldik konstrýktsiialardan mektepter salý», - dedi Ashat Aimaǵambetov.
