Úkimet saǵatynda QR Bilim jáne ǵylym ministri Ashat Aimaǵambetov qazaqstandyq bilim halyqaralyq reitingterde neshinshi orynda ekendigin aitty, dep habarlaidy QazAqparat.
Bilim jáne ǵylym ministriniń aitýynsha, Qazaqstan 2017 jyldan bastap bilim berý jáne innovatsiialyq saiasat jónindegi EYDU komitetteriniń múshesi. IMD jahandyq básekege qabilettilik reitinginde «Bilim» sýbfaktory boiynsha álemniń 64 eliniń arasynda Qazaqstan 26-shy orynda. Osy reitingtiń 20 kórsetkishiniń bestiginde Qazaqstan birinshi orynda tur.
2019 jylǵy Dúniejúzilik ekonomikalyq forýmnyń Jahandyq básekege qabilettilik indeksinde (DEF JBI) «Daǵdylar» faktory boiynsha Qazaqstan 140 eldiń ishinde 57-orynǵa ie boldy. Sondai-aq, 2019 jyly «WorldSkills International» halyqaralyq baiqaýynda bizdiń qurama 14 oryndy ielendi.
- Eger, PIRLS zertteýinde mátindi túsiný jáne oqý saýattylyǵy boiynsha bizdiń oqýshylar 27 orynda bolsa, TIMSS zertteýindegi matematika jáne jaratylystanýda akademiialyq bilim boiynsha myqtylardyń biri jáne kóshbasshy elderdiń ondyǵyna kiredi. PISA-2018 nátijeleri osy jyldyń jeltoqsanynda belgili bolady, - dedi Ashat Aimaǵambetov.
PIRLS, TIMSS, PISA — ár túrli bilim salalary men túrli jas erekshelikteri úshin saýattylyq kórsetkishteri bolyp tabylady. Eger, PIRLS bastaýysh synyp oqýshylarynyń sabaq ústinde oqyǵan materialdy paidalana bilý qabiletin kórsetse, TIMSS jaratylystaný-ǵylymi jáne matematikalyq bilimniń sapasyn ólsheidi. PISA jasóspirimderdiń daǵdylaryn baǵalaidy.
2018 jyly Qazaqstan TALIS halyqaralyq zertteýine alǵash ret qatysty. Bul mektepterdegi muǵalimderdi, direktorlardy jáne bilim berý ortasyn zertteýdiń eń aýqymdy túri. Zertteý nátijelerin EYDU elderiniń nátijelerimen salystyrýǵa bolady, keibir pozitsiialarda artyqshylyqtary bar. Mysaly, qazaqstandyq muǵalimder EYDU elderiniń kóptegen muǵalimderinen 3 jylǵa jas, ortasha jasy - 41 jas. EYDU elderinde - 44. Qazaqstan eń jas direktorlary bar top-7 eldiń qataryna kiredi. Muǵalimderdiń 86%–y kásibi damý olardyń oqytýshylyq praktikasyna oń áserin tigizgenin aitty (EYDU-82%).
