Temirjoldaǵy zańsyz jolaýshy tasymalyn toqtatý úshin Nur-Sultan men Qaraǵandy qalasynda ilki joba iske qosylmaq, dep habarlaidy QazAqparat.
Joba boiynsha qolynda bileti joq jolaýshylar perronǵa jiberilmeitin bolady. «Qazaqstan temir joly» ulttyq kompaniiasynyń basqarma tóraǵasynyń birinshi orynbasary Qanat Álmaǵambetovtiń aitýyna qaraǵanda, osy arqyly bilet almaǵan jolaýshylardyń jolseriktermen kelisýine tosqaýyl qoiylmaq.
«Biyl ilki joba boiynsha elordadaǵy «Nurly jol» vokzaly men Qaraǵandy vokzalynyń perrondaryna biletsiz adamdardyń jaqyndaýyna shekteý qoiylady. Mundai bastamany buryn da kótergenbiz. Alaida qoǵam tarapynan kóptegen narazylyqtar bolǵan. Bul bastamany quqyq qorǵaý organdary da qoldap otyr. Biz de durys dep sanaimyz. Tym bolmaǵanda iri vokzaldardyń perrondaryna osyndai shekteý qoiyp bastaý qajet», – dedi ol.
Ol sondai-aq, «Talgo» poiyzynda jolserikterden zábir kórgen jolaýshyǵa «Qazaqstan temir joly» tarapynan qandai jaǵdaida moraldyq shyǵyn tólenetinin aitty.
Eske salsaq, avtomobil joldary men kóliktik baqylaý salasyndaǵy sybailas jemqorlyqqa qarsy kúres máselesine arnalǵan keńeste Qanat Álmaǵambetov elimizde áielderge arnalǵan jeke vagondar iske qosylmaitynyn aitqan bolatyn.
Atalmysh keńeste QR Bas kólik prokýrorynyń mindetin atqarýshy Jasulan Elamanov temirjol biletterin satýǵa arnalǵan Mobius júiesi zańsyz bilet ainalymyna tosqaýyl bola almaǵanyn atady.
