«Bilain» brendiniń qojaiyny reseilik Vimpelcom telekommýnikatsiialyq kompaniiasy onyń ataýyn VEON dep ózgertýdi oiǵa alyp otyr, dep habarlaidy Bi-bi-si. Bul týraly abctv.kz jazdy.
Kompaniianyń resmi aqparatynda aitylǵandai, osy jyldyń 30 naýryzynda ótýge tiis kezekten tys jiynda aktsionerler maquldaityn bolsa, onda ataýyn ózgertpek.
«Qazirgi kompaniia 24 ai buryn bolǵan kompaniia emes, qazir ol eskirgen telekommýnikatsiialyq biznesten VEON tehnologiialyq kompaniia retinde transformatsiialanyp jatyr», – delingen habarlamada.
Vimpelcom bul sheshimin osy jyldyń sońynda birqatar elde VEON internet-platformalardy iske qosatyndyǵymen túsindiredi.
Aitýlarynsha, dál osyndai platforma ótken jyldyń sońynda Italiiada sátti júzege asqan. Byltyrǵy qarashada «Reiter» agenttigi Vimpelcom-ǵa tiesili italiialyq Wind operatory men gonkongtyq Hutchison birlesip óziniń klientteri úshin VEON dep atalatyn tegin messendjerdi iske qosqanyn habarlaǵan bolatyn.
Ol ózge de tanymal messendjerler sekildi jumys isteidi, biraq qoldanýshylar operatorǵa trafik úshin aqy tólemeidi. Kompaniia ókilderi Amsterdamdaǵy Euronext birjasynda qaitalama listing júrgizýdi kózdep otyrǵanyn habarlady. Kompaniianyń shtab-páteri de osy qalada ornalasqanyn aita ketken jón.
Kompaniia, eger aktsionerler bekitetin bolsa, onda VEON tikerimen saýda jasaityn bolady. Kompaniianyń resmi habarlamasynda ózgeristi onyń qurylymymen de bailanystyrǵan.
«Kompaniia aitarlyqtai qaita qurylyp, birneshe jyldyq quldyraýdan keiin ósim kórsete bastady», – delingen habarlamada. 2016 jyldyń qorytyndysy boiynsha kompaniia bir aktsiia úshin 23 tsent deńgeiinde divident tóleidi.
Bul kompaniianyń jobalar qorjynyndaǵy ózgeristermen bailanysty. Tórtinshi toqsanda Vimpelcom-nyń túsimi 2,5%-ǵa, 2,3 mlrd dollarǵa deiin ósti.
Negizgi ótkizý naryǵy Resei bolyp otyr, ondaǵy túsim 1,1 mlrd dollardy quraidy. Kompaniia Resei, Qazaqstan, Italiia, Pákistan, Aljir, Bangladesh, Ýkraina jáne Ózbekstanda jumys isteidi.
