Belgili jýrnalist Bigeldi Ǵabdýllin málimdeme jasady, - dep habarlaidy "Ult aqparat" Central Asia Monitor basylymyna silteme jasap.
Central Asia Monitor gazeti bas redaktorynyń keńesshisi mindetin atqarýshy Bigeldi Ǵabdýllin oqyrmandaryna BAQ-taǵy ary qaraiǵy jumysy týraly málimdeme jasady.
"Jýrnalistikamen ainalysqanymy qyryq jyldai ýaqyt boldy. Zeinetke de az qaldy. 2017 jyldyń 24 qańtaryndaǵy sot úkimi boiynsha men basshylyq oryndardy jumys isteý múmkindiginen aiyrylyp, bes jylǵa sottaldym. (...) Alaida meniń jibergen aǵattyǵym jýrnalistika jáne baspa qyzmetinde ary qarai jumys isteýge múmkindik bermeidi dep oilaimyn", - delingen Ǵabdýllinniń málimdemesinde.
"Bul meniń sanaly túrde qabyldaǵan sheshimim. Men bárin baǵamdadym. Bul sheshimniń astarynda eshqandai saiasi sebep joǵyn erekshe atap ótkim keledi. Men N.Á.Nazarbaevty jáne onyń qazaqstandyqtardyń ómirin jaqsartýǵa baǵyttalǵan saiasatyn qoldaýshy bolyp qala beremin", - dep atap ótti ol.
"Iá, men - QR Prezidenti saiasatyn qoldaýshymyn, óitkeni Qazaqstan jaǵdaiynda eń durys saiasat ekenine birneshe ret kózim jetti. Kez kelgen adamda qatelik bolady. Mańyzdysy ony der kezinde túsinip, oi túiý", - delingen málimdemede.
Bigeldi Ǵabdýllin 2016 jyldyń qarashasynan 2017 jyldyń qańtaryna deiin qamaýda bolǵan. Tergeý Ǵabdýllin ózine qarasty BAQ-ty paidalanyp, memlekettik organdardyń basshylaryna olardyń "iskerlik bedeline nuqsan keltiretin materialdar jariialaý jolymen" aqparattyq shabýyl jasaǵan, keiin ol laýazymdy tulǵalardan "syni jariialanymdardy toqtatý úshin óz aqparat quraldaryna memlekettik tapsyrystar berýdi bopsalaǵan" deidi.
Bigeldi Ǵabdýllin sotta ózine taǵylǵan aiyptardy moiyndap, "memlekettik tapsyrys alý úshin bopsalaý" jolymen alǵan qarjysyn qaitaryp, bas bostandyǵyn shekteitin jaza alǵan.
Bigeldi Ǵabdýllin 1990 jyldardyń ortasynda burynǵy premer-ministr Ákejan Qajygeldindi qoldaǵan oppozitsiialyq "21 ǵasyr" basylymynyń bas redaktory bolǵan. Ol 2001 jyly qýǵyndalyp, Qazaqstannan AQSh-qa ketip, ol jaqtan saiasi baspana alǵan. Ǵabdýllin 2004 jyly saiasi emigratsiiadan oralyp, Qazaqstan prezidenti Nursultan Nazarbaevtan keshirim suraǵan. Qazaqstanǵa oralǵan soń ol Central Asia Monitor gazetin ashyp, Radiotochka.kz saityn qurǵan.
Ulybritaniiada turatyn Ákejan Qajygeldin 2001 jyly syrttai korrýptsiialyq qylmys jasady dep aiyptalyp, 10 jylǵa sottalǵan.
Radiotochka.kz saity biyl sáýirde "qarjylyq máselelerge bailanysty jumysyn toqtatatyny" habarlanǵan.
