Qazaqstan quramasynyń bas bapkeri Ǵalymbek Kenjebaev Bibosynovtyń jekpe-jegi boiynsha nege narazylyq jasalmaǵanyn aitty, dep habarlaidy Sputnik Qazaqstan .
"Bul Olimpiada AIBA-nyń (Halyqaralyq boks qaýymdastyǵy - Sputnik) erejesi boiynsha ótip otyrǵan joq. Onda bapkerlerge jekpe-jektiń qorytyndysyna qarsylyq bildirýge múmkindik beriledi. Árbir komandaǵa eki ret narazylyq jasaýǵa bolady. Al osy joly bárin Halyqaralyq Olimpiada komiteti uiymdastyryp otyr. Olar Olimpiadanyń aldynda bárimizge "protest bolmaidy, protest jazbai-aq qoiyńdar" degen. Báribir qaralmaidy. Sol sebepti narazylyq bildirgen joqpyz", - dedi Kenjebaev ortalyq kommýnikatsiialar qyzmetinde ótken onlain brifingte.
Onyń aitýynsha, bapkerler Bibosynovtyń finalda altyn alatynyna senimdi bolǵan.
"Biz Sáken finalǵa shyqsa, endigi qarsylasy filippindik bolady dep oiladyq. Bibosynov ony Iordaniiada ótken týrnirde jeńgen. Altyn alýǵa bolatyn edi. Biz altyndy Sákennen ǵana kútken joqpyz. Basqa da jigitter boldy. Biraq olardyń joly bolmai, utylyp qaldy. Boksta biz árbir sportshydan úmit kútemiz. Osy joly Sáken jaqsy daiyndalyp keldi. Birinshi jekpe-jekten bastap jaqsy óner kórsetti. Ókinishke qarai, bolmady", - dep atap kórsetti Kenjebaev.
Bas bapker boksshylarǵa psihologiialyq turǵyda qiyn boldy dep sanaidy.
Búgin Tokio Olimpiadasynda sońǵy boksshymyz Sáken Bibosynov jartylai finalda ulybritaniialyq Galal Iafaidan 2:3 esebimen utylyp, qola medaldi qanaǵat tutty.
Aita keteri, osy joly bokstan Qazaqstan quramasy alǵash ret Olimpiadadan altyn medalsiz qaitady. Tokioda olar eki qola ǵana jeńip aldy.
