QR Mádeniet jáne sport ministri Dáýren Abaev álem shahmaty tarihyndaǵy eń jas álem chempiony Bibisara Asaýbaevamen kezdesti, dep habarlaidy QazAqparat.
Kezdesý barysynda ministr Bibisara Asaýbaevany quttyqtai kele, anasy Liana Tańjaryqovaǵa alǵysyn bildirip, «Dene shynyqtyrý men sportty damytýǵa sińirgen eńbegi úshin» tósbelgisimen marapattady.
«Bibisara – el maqtanyshy. Búkil álem kóz tikken bedeldi týrnirdegi Bibisara Asaýbaevanyń jarqyn jeńisi elimizdegi shahmat tarihynda altyn árippen jazylady. Osy oraida Bibisaranyń ata-anasyna, jattyqtyrýshylaryna erekshe alǵys bildirgim keledi. Bibisara Asaýbaevanyń aitýly jeńisi óseleń urpaqtyń shahmat sportyna degen qyzyǵýshylyǵyn arttyryp, yntalandyratyny sózsiz», - dep atap ótti Mádeniet jáne sport ministri.
Esterińizge sala keteiik, Polsha astanasy Varshava qalasynda ótken álem chempionatynda 17 jastaǵy qazaqstandyq shahmatshy Bibisara Asaýbaeva «blitste» birinshi oryndy jeńip alyp, álemdik shahmat tarihynda áielder arasynda eń jas shahmatshy ataǵyna ie boldy.
Sondai-aq atalmysh chempionatta Bibisara jyldam shahmattan (rapid) 2-oryndy ielendi .
Buǵan deiin qazaqstandyq sportshy Bibisara Asaýbaeva qyzdar arasynda 8, 10, 12 jáne 14 jasqa deiingi klassikalyq shahmattan álem chempiony, 7, 9 jasqa deiingi oqýshylar arasynda álem chempiony atanǵan.
