KSRO halyq ártisi Bibigúl Tólegenova qazaqstandyq ánshiler Qairat Nurtas pen Dimash Qudaibergendi salystyrdy, - dep habarlaidy kaz.tengrinews.kz tilshisi.
Aita keteiik, taiaýda Jelide Bibigúl Tólegenovanyń "Astana" telearnasyndaǵy "El aýzynda" baǵdarlamasyna bergen suhbatynyń úzindisi paida bolǵan edi. Videoda ol Dimash Qudaibergendi "kókke", al Qairat Nurtasty "jerge" teńegen.
Osy pikirine qatysty oiyn tolyq jetkizýin suraǵanymyzda Bibigúl Tólegenova shyn máninde eki ánshige osylai baǵa beretinin rastady.
"Bizde Qairat siiaqtylar myńdaǵan. Men qazir 88-demin. Osy jasyma deiin osyndai qanshama "qubylysty" kórdim. Al solar qaida? Qairat toilarda án aitatyn adam, ol jergilikti oryndaýshy. Qairatty bizden basqa kim tanidy, surap kórińizdershi (...) Al biz ony Dimashpen salystyramyz. Ekeýiniń arasy jer men kóktei (...) Men Qairat Nurtasty ánshi dep eseptemeimin, tilimdi kesip alsańyzdar da solai. 5 jyldan keiin Qairat bolmaidy, oǵan qazirdiń ózinde eliktep shyǵyp ta jatyr. Sebebi mundai óner báriniń qolynan keledi. Al Dimashqa elikteý óte qiyn. Dimashtai bolý úshin nápaqa tabýǵa toiǵa barmai, bala kúnińnen bastap oqýyń kerek", - dedi Tólegenova.
Aita keteiik, osyǵan deiin Qairat Nurtastyń prodiýseri Gúlzira Aidarbekova Qairatty Meirambek Besbaevpen, Tóreǵali Tóreálimen, Ernar Aidarmen, qala berdi Dimash Qudaibergenmen salystyrýdyń durys emes ekenin málimdegen bolatyn.
Osynyń aldynda Tólegenova Dimash Qudaibergenge I Am a Singer baiqaýy finalynda jeńiske jetýin tilep, batasyn bergen bolatyn. Aita keteiik, baiqaýda qazaqstandyq ánshi ekinshi oryn aldy.
Eske salaiyq, Bibigúl Tólegenova 2014 jyly da Qairat Nurtasty darynsyzdyǵy úshin synap, qazirgi estradada sol siiaqty "birkúndik juldyzdardyń" tolyp ketkenin aitqan bolatyn. Al keiin Qairat Nurtas Bibigúl Tólegenovanyń synyna jaýap bergen edi.
