«BI Group» kompaniiasynyń baspasóz qyzmeti kompaniia basshysy Aidyn Rahymbaevtyń koronavirýs juqtyrǵandarǵa arnalǵan emhana qurylysy týraly jaǵymsyz aqparat taratqandardyń ústinen aryzdanatyny týraly málimdemesin túsindirdi, dep habarlaidy QazAqparat.
«BI Group kompaniiasyna qatysty áleýmettik jelilerde shyndyqqa sáikes kelmeitin ári kompaniianyń iskerlik abyroiyna nuqsan keltiretin aqparat ádeii taratyldy. Sol sebepti holdingtiń atyna kir keltiretin jala sipatyndaǵy málimetterdiń bastamashysyn tabýdy jón dep sheshtik. Ol adamdardy tapqannan keiin bizdiń zańgerler sot protsesine daiyndyqty bastaidy», - dep habarlady BI Group holdinginiń PR-direktory Iýrii Dorohov redaktsiianyń resmi saýalyna bergen jaýabynda.
Kompaniia jalǵan aqparat taratqan adamdardy zańǵa sáikes jazalaýǵa bekinip otyr.
«Qylmystyq kodekske sáikes jaýapkershiliktiń qandai bolatynyn sot sheshedi. Bul jerde áńgime anonimdi telegram-kanal arqyly Qazaqstannyń úsh qalasynda emhana salýǵa qatysty jalǵan aqparat taratý týraly sóz bolyp otyr», - dep qosty ol.
Aita ketsek, buǵan deiin «BI Group» kompaniiasynyń basshysy Aidyn Rahymbaev Facebook-paraqshasynda jazba jariialap, jala jabýshy adamdardy sotqa beretinin málim etken edi.
«BI Group kompaniiasy osyndai qysyltaiań kezeńde protsedýralardy paidalanyp, aqsha tapqysy keledi degen syńaida aqparat tarala bastady. Kelisimge qol qoimai jatyp, jumystyń bastalyp ketkeni týraly shynaiy jáne feik-akkaýntardan jazyldy. Belgisiz bireý taratqan bul aqparat qalaida keń aýqym alyp barady», - dep jazdy Aidyn Rahymbaev Facebook-te.
Onyń aitýynsha, bir apta buryn koronavirýs boiynsha respýblikalyq shtab tez turǵyzylatyn emhanany salý qajettigi týyndaýy múmkindigin habarlaǵan. Jáne ol úsh aptada salynyp bitýi tiis. Osylaisha, «BI Group» kompaniiasy injenerlik, tehnikalyq, logistikalyq jáne adamdardyń resýrstaryna ie Qazaqstandaǵy iri kompaniia retinde jumys tobyna engizilgen.
«Bul - halyqaralyq tájiribe. Eki táýliktiń ishinde jabylǵan qalalar men shekaralardan qurylys materialdaryn jetkizý boiynsha qanshama nusqany qarap, aqyry eldegi bar materialmen emhanany salýdy jón dep sheshtik», - deidi Aidyn Rahymbaev.
