Bilim jáne ǵylym vitse-ministri Miras Dáýlenov joǵary oqý oryndarynyń akademiialyq-basqarýshylyq derbestigin kúsheitýge baǵyttalǵan sharalardy atady, dep habarlaidy QazAqparat.
«Búgingi tańda negizinen tórt sýbekt joǵary oqý oryndarynan aqparatty surai alady. Olar - joǵary jáne JOO-dan keiingi bilim departamenti, Bolon protsesiniń ortalyǵy, aqparat-analitika ortalyǵy jáne halyqaralyq baǵdarlamalar ortalyǵy. Osyǵan bailanysty Ulttyq bilim berý týraly málimetter bazasynan avtomatty túrde alýǵa bolatyn aqparattardy JOO-lardan suratýǵa tyiym salýdy usynamyz. Iaǵni vedomstvoishilik uiymdarymyz ashyq aqparat kózinde bar málimetti suratpaýy tiis», - dedi Miras Dáýlenov Bilim jáne ǵylym ministrliginiń apparat jiynynda.
Vitse-ministrdiń aitýynsha, ekinshiden Bolon protsesiniń ortalyǵy, aqparat-analitika ortalyǵy jáne halyqaralyq baǵdarlamalar ortalyǵy JOO jumysyna qatysty aqparattardy joǵary jáne JOO-dan keiingi bilim departamenti arqyly ǵana ala alatyndai júie ornatylýy tiis.
«Sondai-aq jeke bastama boiynsha suraýhat joldaýǵa tyiym salý kerek. Iaǵni departament suratqan árbir suranystyń negizi bolǵany durys. Máselen suranyspen birge ministrdiń nemese vitse-ministrdiń buiryǵyna siltememen ǵana suranysty jiberýge bolatyndai etý kerek. Osynyń bári de joǵary oqý oryndarynyń akademiialyq-basqarýshylyq derbestigin kúsheitýge baǵyttalǵan», - dedi ol.
