Eki joǵary oqý ornyna jańa rektor sailandy. Bul týraly Bilim jáne ǵylym ministrliginen málim etti, dep habarlaidy "Ult aqparat".
Respýblikalyq konkýrstyq komissiianyń sheshimimen «Qazaq ulttyq qyzdar pedagogikalyq ýniversiteti» KEAQ Basqarma tóraǵasy – rektor laýazymyna Gúlmira Ámirhanqyzy Qanai sailandy. Ol filosofiia ǵylymdarynyń doktory (PhD).
Ár jyldary G. Qanai Abylai han atyndaǵy Qazaq halyqaralyq qatynastar jáne álem tilderi ýniversitetinde, Vorvik ýniversitetinde (Ulybritaniia), Kembridj ýniversitetinde (Ulybritaniia) oqyp, doktorlyq dissertatsiiasyn qorǵady. Gúlmira Ámirhanqyzy Kembridj Ýniversiteti men Nazarbaev Ýniversitetinde qyzmet atqarǵan.
Direktorlar keńesi usynǵan kandidatýralar boiynsha Respýblikalyq komissiia músheleri «Abai atyndaǵy Qazaq ulttyq pedagogikalyq ýniversiteti» KEAQ Basqarma tóraǵasy – rektor laýazymyna Darhan Nurlanuly Bilálovti sailady.
Ár jyldary D. Bilálov Eýraziia ulttyq ýniversitetinde, Soltústik-Batys ýniversitetinde (AQSh) jáne Pensilvaniia memlekettik ýniversitetinde (AQSh) bilim alǵan. Sońǵy oqý ornynda joǵary bilim berýdegi kóshbasshylyq boiynsha doktorlyq dissertatsiiasyn qorǵaǵan. Darhan Nurlanulynyń BUU DB, Dúniejúzilik bank, Nazarbaev ýniversiteti, Pensilvaniia memlekettik ýniversitetinde jumys tájiribesi bar.
Basqarma tóraǵasy – rektordy sailaý 2 kezeńde ótkiziletin ashyq konkýrs arqyly júzege asyrylatynyn atap ótken jón. Respýblikalyq komissiianyń quramyna Parlament depýtattar, salalyq kásipodaqtyń jáne «Atameken» UKP ókilderi, sondai-aq belgili memleket jáne qoǵam qairatkerleri kirdi.
